沙拿因腦震盪避戰巴塞｜Liverpudlian Ty
利物浦領隊高普明確表示，沙拿係腦震盪，所以唔可以俾佢上陣。雖然沙拿自己感覺 OK，但係喺醫學角度嚟講，係唔足夠嘅。另外，費明奴亦都會缺陣。
上一場對紐卡素嘅聯賽被撞傷嘅利物浦攻擊球員沙拿，喺香港時間星期一由利物浦嘅醫療團隊進一步評估佢嘅傷勢，以便決定佢能否上陣對巴塞隆拿。
今季為利物浦射入 26 球嘅沙拿，喺星期六對紐卡素嘅時候，與對方門將杜巴夫卡相撞，頭部受傷，要接受治理及用擔架床抬離場。呢位埃及國腳已經接受測試，睇吓有冇腦震盪。按照結果，佢肯定無法喺主場對巴塞隆拿嘅歐聯四強次回合賽事中上陣，該西甲球會喺首回合領先 3-0。
用擔架床被抬離場後嘅沙拿，喺場波進行期間，仲可以喺更衣室收看場波嘅情況，兼且喺賽後同關心佢嘅隊友傾計。佢將會喺星期一，利物浦喺 Melwood 操練之前，再次進行評估。
紐卡素門將杜巴夫卡聲稱，沙拿起初並無反應，佢瞓咗喺地上，冇郁動過。
佢話：「我唔知道佢係咪有 5 或者 6 秒鐘冇咗反應，因為法比安舒亞問佢有冇事，佢並冇回答。所以當其時，究竟佢有冇事呢？我哋都感到有啲驚慌。」
「我對佢嘅情況感到難過同抱歉，但係我只係專注喺個波度，有時你唔能夠睇得晒所有嘅嘢。」
「我冇用手打佢，亦冇用拳頭打佢，可能係我嘅臀部，我唔肯定係我，定係其他人。」
「但係我已經同佢致歉。我唔係想整傷佢，我並唔係一個咁嘅人嚟。」
高普強調，沙拿喺周末對狼隊可以上陣。
