畿內亞足協主席炮轟高普誇大基達傷勢 | Liverpudlian Ty
利物浦中場球員拿比基達喺歐聯四強首回合賽事早段受傷離場，領隊高普喺星期五透露，呢位畿內亞國腳因為內收肌受傷，需要抖兩個月，並且會無法喺夏天舉行嘅非洲國家盃決賽周上陣。但係高普呢番言論，惹來畿內亞足總主席安東尼奧蘇亞利嘅強烈回應，認為係「草率同埋自以為是」。
掃描結果顯示，拿比基達嘅內收肌，有斷裂嘅情況，意味著預期佢無法參與喺下個月舉行嘅非洲國家盃。
非洲國家盃決賽周將於 6 月 21 日至 7 月 19 日，喺埃及舉行。令到開始康復療程嘅拿比基達，喺上述期間為國家隊上陣嘅機會相當低。
但係，畿內亞足總主席蘇亞利對高普嘅言論作強烈回應，並且聲稱拿比基達只需要抖幾個星期。
蘇亞利覺得，拿比基達雖有上述嘅傷患，仍然有機會參加非洲國家盃決賽周，並且要求利物浦領隊高普「俾醫生去做佢哋嘅工作」。
蘇亞利向 Football Factory Radio 表示：「首先，我哋希望拿比基達會康復得非常好同埋快。以我所知，內收肌嘅傷患唔會令佢踢唔到非洲國家盃，喺 6 月 22 日為畿內亞國家隊上陣。」
「內收肌受傷需要抖兩至三個星期，利物浦教練應該俾醫生去做佢哋嘅工作。」
「拿比基達屬於利物浦之前，係屬於一個國家嘅。如果利物浦嘅教練唔知道嘅話，我會提醒佢呢樣嘢。」
「所以佢作出呢啲言論係草率同埋自以為是。我哋所知嘅係，拿比基達將會踢 2019 年嘅非洲國家盃。」
畿內亞國家隊踢非洲國家盃決賽周之前，會喺 6 月 16 日，與埃及進行友賽。六日之後，就會踢非洲國家盃決賽周首場賽事，對手係馬達加斯加。
利物浦領隊高普喺星期五嘅記者招待會，講到拿比基達嘅最新情況，確認呢位中場球員今季提早「收咧」。
高普確認：「呢個真係不幸，係一個壞消息。」
「佢曾經處於一個真係好好嘅時刻，但係事情發生咗，有時足球同人生就係咁架喇。呢個唔係一件好事嚟，係非常嚴重架。」
「一方面佢唔能夠參與今季嘅賽事；另一方面，畿內亞唔係非洲國家盃嘅常客，對佢嚟講，當然會係一個大嘅目標嚟。」
「當然佢宜家處於一個唔好嘅情況，但係呢個就係你要幫助球員嘅時候，我哋會盡其所能。」
