謝拉特承認想買斷賴恩肯特 | Liverpudlian Ty
蘇超球會格拉斯哥流浪領隊謝拉特承認，佢希望能夠買斷來自利物浦嘅借將賴恩肯特（Ryan Kent）。
賴恩肯特今季為格拉斯哥流浪喺所有賽事上陣 40 次，射入 6 球。
謝拉特喺格拉斯哥流浪對喜伯年嘅賽前記者招待會上，講到賴恩肯特。
佢話：「賴恩肯特知道我哋想要佢，利物浦都係。」
「但係佢將要作出一個重大決定，因為會有唔少球會想得到佢嘅加盟。我俾賴恩肯特嘅意見係，去一個你會感到快樂嘅地方。」
據媒體報道，喺今個星期較早前，賴恩肯特想結束呢個不斷被外借嘅循環。
現年 22 歲嘅賴恩肯特，已經踢過 5 間球會。佢曾經為利物浦上陣過 1 次，係喺 2016 年，足總盃第三圈賽和埃克塞特（Exeter City）。
根據 Daily Record，賴恩肯特透露佢想開展佢事業嘅野心。
佢話：「我宜家想喺某個地方開始我嘅球員生涯。每一年都要去唔同嘅球會，我感到厭倦。我想喺一個地方安頓落嚟。」
「利物浦對我好好，但係每一年返嚟，喺季前期間表現良好，然後再次被外借，呢個係不斷嘅循環。」
「我同利物浦仲有三年合約，同埋冇更多嘅嘢我真係可以做架喇。」
「無論我喺夏天有冇機會去其他球會，我想去一間有野心嘅球會，一間想爭取錦標嘅球會。」
利物浦曾經表示，要羅致賴恩肯特，起碼要 £12M，並且唔太可能喺夏天再次將佢外借。
