利物浦雖然喺歐聯四強首回合落敗，但係面對擁有主場之利嘅巴塞隆拿，表現絕對不落下風，可惜多次入球機會都無法好好把握。嚟緊將會重返聯賽，作客聖占士公園，面隊由前領利物浦領隊賓尼迪斯執教嘅紐卡素，紅軍必須全取三分，保持聯賽爭標機會。領隊高普出席賽前記者招待會，主要內容如下：
1. 關於拿比基達嘅受傷，高普表示：「呢個真係不幸，係一個壞消息。高級別嘅內收肌受傷，肌腱斷裂，將要抖至少兩個月。對我哋，同埋將會參加非洲國家盃決賽周嘅畿內亞國家隊嚟講，都係壞消息，唔係一件好事。」
2. 講到對手紐卡素，高普認為：「係一場難應付嘅賽事，佢哋正處於非常好嘅時刻。喺最近呢幾個星期，佢哋已經贏咗好幾場賽事，並且姿態輕鬆。佢哋之前對完我哋之後，已經轉變咗陣式。」
3. 談及巴塞隆拿，高普話：「我哋從來都唔會糾纏喺上一場波太耐，我哋冇咁嘅時間。我哋應該喺星期二去嘗試去部署同準備，並唔係宜家。班球員完全專注喺對紐卡素嘅賽事。」
4. 被問到同曼城踢附加賽嚟決定英超冠軍誰屬嘅可能性，高普認為：「嘩！老實講，我冇諗過喎。呢個應該會係一件好正嘅事，但係我認為唔係咁大可能。」
5. 高普話：「我哋唔需要喺巴塞隆拿度搵一啲球員，並且同佢哋擁抱，呢樣嘢係我哋嘅。如果你想贏波，你就要接受到落敗。關於對巴塞隆拿場波，因為我哋當時喺球場上嘅表現，我有正面嘅想法多於負面。」
6. 高普表示：「球隊喺最近呢幾個星期嘅表現出色，宜家我哋要繼續咁樣落去。」
7. 高普話：「如果宜家開始，要攞到 98 分先至能夠奪得聯賽冠軍嘅話，會係一件有趣嘅事，但係我唔知。無論有咩事情發生，呢個會係一個特別嘅球季。我係咪完全感到滿意？唔係，因為球季並未完結。」
8. 高普表示：「班球員嘅狀態非常好。當你競賽或者競逐緊錦標嘅時候，你唔會感到疲倦，我哋充滿野心。我哋可以做嘅嘢，就係擊敗紐卡素，而呢樣嘢係難以置信地困難嘅。至於其他球隊喺星期一晚嘅情況，並唔係我哋嘅問題。」
9. 高普話：「更衣室喺呢兩年嘅情況，絕對係非常之好。每人都搵到自己嘅角色，球員變得更具自信。我哋真係好「利物浦」，係一件美妙嘅事情，呢樣嘢係班球員創造出嚟架。」
10. 講到張伯倫，高普表示：「佢能夠候命同埋復出，呢個實在完美，我哋拭目以待。肯定嘅係，佢會喺大軍之中，我哋將會決定邊個正選上陣。」
11. 談及韋拿杜姆喺巴塞隆拿場波嘅角色同位置，高普解釋：「佢能夠踢任何一個位置。當我話佢知嘅時候，佢感到驚訝。佢需要時間去適應同埋習慣，但係喺下半場，佢嘅表現真係唔錯。我哋需要一個防守好嘅進攻球員。」
12. 對於費明奴會否復出對紐卡素，高普睇嚟唔係太過有信心，佢只係話「拭目以待」。費明奴喺對巴塞隆拿場波完場後，直接步離球場。
