利物浦今夏離隊球員一覽 | Liverpudlian Ty
喺夏天轉會窗期間，利物浦並唔預期球隊陣容會有大變動。
今季喺英超聯賽可能會以 97 分結束球季，如果曼城失分嘅話，甚至令利物浦有機會奪得聯賽冠軍。另一方面，利物浦現時再次晉身歐聯四強，有機會連續兩年晉身決賽，因此可見唔需要喺球隊人腳作出重大調整。
但係，作為一間球會，球員加盟或離隊係常態嚟，嚟緊將會係第四個全個球季執教利物浦嘅高普，會尋求對球隊陣容作出一啲嘅調整，但係相信唔會有龐大嘅變動。
如果冇續約談判展開嘅話，有幾位球員將於夏天離開利物浦，因為佢哋嘅合約亦都將會屆滿，當中包括以下呢幾位球員。
– 史杜歷治
喺上個夏天，似乎呢位曾效力曼城及車路士嘅前鋒，會成為被清洗嘅對象。直至喺 2018/19 年球季之前，先至令到領隊高普再次給予出賽機會。
喺季前期間，史杜歷治改變自己，成為一個可以踢得比較墮後一啲嘅球員。佢嘅表現一度甚有起色，尤其是射入咗一個相當精彩嘅入球，協助利物浦賽和車路士。但係呢個入球，已經係佢今季聯賽兩個入球之中嘅其中一個，而另一個入球，係喺 8 月份對韋斯咸射入嘅，佢今季喺聯賽只係上陣咗 17 次。
現時奧歷治似乎喺球隊嘅位置已經排喺史杜歷治之前，加上來季仲會有年青前鋒 Brewster 嘅冒起，相信會令史杜歷治更難取得上陣時間。
喺今季約滿嘅史杜歷治，正賺取一定水平嘅周薪，但係有幾間英超球會應該會對佢有興趣。佢仍然係頗有質素嘅球員，即使速度已經冇以前咁高。
– 摩蘭奴
呢位西班牙左閘，今季只係為利物浦喺聯賽上陣兩次，分別係主場對卡迪夫城，同埋作客對般尼。羅拔臣已經奠定其正選位置，有需要時，占士米拿都可以頂上。
現年都仲只係 26 歲嘅摩蘭奴，上季曾經有段時間表現唔錯，但係自從羅拔臣取得上陣機會之後，就已經成為球隊嘅正選左閘。佢喺今季缺乏上陣機會，意味著佢將會離隊，今個夏天佢肯定將會離隊他投。
一直有媒體將佢同巴塞隆拿扯上關係，假設真係咁嘅話，佢會成為佐迪艾巴嘅後備，並且會再次遇上古天奴。同時間，有幾間西班牙球會都對佢頗有興趣。
– 預備組及青年軍
現年 20 歲嘅艾迪簡耶，喺 2015 年由巴塞隆拿嘅拉馬西亞青訓學院加盟利物浦，佢今季合約期滿後，會自由轉會，現時意甲球會拉素最有機會羅致佢。呢位年青翼鋒，嚟到利物浦時頗有名氣，但係最終佢將會喺其他球會證明及展現自己嘅價值。
同時，現年 31 歲，外借於蘇超球會喜伯年嘅匈牙利門將保丹，亦都將會物色新球會。另外，現時踢緊利物浦 U23 賽事，經常被安排踢中場，但係本身係一名右閘嘅 23 歲球員蘭度爾，亦都勢將離隊。
仲有其他年青球員嘅合約亦都即將屆滿，包括曾經一度相當備受好評，由巴塞隆拿羅致嘅左閘桑馬。現年 22 歲嘅佢，睇唔到有機會上到一隊，或者嚟到 Melwood 與一隊球員操練嘅機會。
喺 12 月就會 22 歲嘅哥利韋倫 (Corey Whelan)，同埋曾經喺上季歐聯對曼城時，成為後備嘅中堅馬斯達臣 (Conor Masterson)，亦都勢將於約滿後離隊。有傳來季會重返英超嘅諾域治，對馬斯達臣有興趣。
自從喺 2017 年加盟以來，受到傷患困擾嘅挪威中場達斯夫 (Edvard Tagseth)，亦係另一位勢將離隊嘅球員。現年 18 歲，曾經備受好評嘅達斯夫，當謝拉特仍然係利物浦 U18 青年軍教練嘅時候，對佢相當欣賞。今季由 Barry Lewtas 執教利物浦 U18，達斯夫有上陣機會，但係未能重返正選位置，並且亦都未能重拾自從 2018 年 3 月受傷之前嘅狀態同埋表現。
當然現時仲有時間就新約達成協議及繼續留隊，但係隨著越來越接近球季結束，兼且又冇續約嘅消息，佢哋離隊嘅機會已經係越來越大。
