高普：我唔需要知道英超或歐聯會畀到我哋最佳嘅奪標機會｜Liverpudlian Ty
利物浦將於歐聯四強首回合，作客對巴塞隆拿，絕對會係一場非常難應付嘅硬仗。領隊高普及攻擊球員文尼出席賽前記者招待會，主要內容如下：
1. 文尼話：「我會嘗試所有嘅嘢幫助球隊，以便取得正面嘅戰果。」
2. 文尼表示：「上季能夠晉身歐聯決賽，對我哋嚟講真係一個好嘅經驗，同埋能夠有機會面對世上其中一隊最好嘅球隊。」
3. 講到費明奴，文尼表示：「我哋好開心見到費明奴復出，因為佢對我哋嚟講，就係一個咁重要嘅球員。」
4. 文尼話：「我感到興奮，並且希望能夠為球隊取得入球。」
5. 被問到雲迪克搞唔搞得掂美斯，文尼認為：「肯定可以。我哋對佢有信心，同埋佢會為球隊付出所有，我哋會嘗試所有方法去取得好嘅戰果。」
6. 講到古天奴，文尼話：「古天奴係一位好出色、好出色嘅球員，對於巴塞隆拿有佢喺球隊之中，我感到有點嫉妒！佢仍然年輕，並且仲會有好大嘅進步空間，因為佢係一位勤力嘅球員。」
7. 文尼表示：「朗拿甸奴係我嘅偶像，我真係好喜歡睇佢踢波。老實講，我仍然喜歡佢，並且好想擁有佢嘅笑容！」
8. 文尼話：「魯營球場係一個非常好嘅球場，自從我細個嘅時候，就有睇巴塞隆拿嘅賽事。我哋所有人都鍾意睇波，對我哋嚟講，喺呢類球場上踢波，係一件好事。但係，呢個將會成為我哋嘅動力，而唔係壓力。」
9. 高普向佢周圍嘅眾多媒體攝影師表示：「如果你 Google 我個名，你將會發現好多我嘅相片已經喺晒度架喇！」
10. 高普話：「我係一個喜歡足球嘅人，我點會去諗呢個球場有啲乜嘢唔好呢？我哋想喺呢度，踢出最好嘅足球。」
11. 高普表示：「巴塞隆拿喺首回合會有主場之利，下星期二嘅次回合賽事，就會係我哋主場。我哋嘅表現越好，氣氛就會越令人激動，我哋睇吓邊隊能夠最善用到呢樣嘢。」
12. 高普話：「巴塞隆拿唔係只有美斯。我哋能唔能夠專注喺美斯身上？我哋應該咁做，不過喺喺某啲時候囉。佢哋仲有 10 位世界級球員，能夠決定同改變戰果嘅。美斯喺今季開季前講過，『我哋要將歐聯獎盃帶回家』，聽起上嚟好似係對我嘅一個威脅咁，我哋都想晉身決賽。」
13. 高普表示：「打和並唔係世上最差嘅結果。有好多人，擁有一套計劃，嚟到巴塞隆拿，但係最終係遭受打擊。」
14. 高普話：「我哋喺英超同歐聯錦標都有機會競逐，我哋要去踢呢啲賽事。比賽之前，係冇贏或輸嘅。我唔需要知道邊個賽事會俾到我哋最佳嘅機會。」
15. 高普認為：「呢個係一件非常好嘅事。唯一一樣嘢可能更好嘅應該係，有人告知我哋已經係冠軍，係呢班球員創造咗一個咁美好嘅情況。兩年前，球會能夠取得歐聯資格，已經係一件好大、好大嘅事情。宜家，我哋第二次晉身歐聯四強。」
16. 被問到比較想巴塞隆拿用古天奴，定係奧斯文尼丹比利踢正選嘅時候，高普回應：「我好高興能夠再次見到古天奴，但係呢個係由華維迪去決定。我要去決定自己球隊嘅出場陣容，都已經有足夠嘅事情要去做。」
17. 被問到巴塞隆拿會否係佢執教利物浦以來，最難應付嘅對手，高普表示：「我唔肯定可唔可以喺度講呢樣嘢，但係皇家馬德里都係頗難應付嘅。」
18. 高普話：「記得當時我仲係多蒙特嘅領隊，喺一間位於 Ibiza 嘅餐廳，但係已經冇吉枱。跟住佢哋話：「噢！你係高普，你可以有張枱，因為你擊敗咗皇家馬德里！」」
19. 高普表示：「喺我所見過嘅球員當中，我會話美斯係 Number 1。我以往都有教過一啲唔錯嘅球員。我爸爸成日話比利，但係當時嚟講，睇佢踢波嘅話，我實在係太細個喇。」
20. 高普話：「係，我哋好掛住古天奴，因為佢係一位世界級球員，同埋我亦喜歡同佢共事。但係冇佢之後，我哋都做得好好。」
21. 高普表示：「我哋唔需要額外嘅動力，我哋會瘋狂地戰鬥。」
22. 高普話：「能夠連續兩年晉身歐聯四強，係一個出色嘅成就。巴塞隆拿正在等緊我哋，宜家我哋嘗試去做啦。」
