Paul Joyce：張伯倫將與紅軍續約 | Liverpudlian Ty
根據 Times Sport 記者 Paul Joyce，利物浦將會與膝部受傷一年後，最近正式復出嘅張伯倫續約，可見球會對呢位英格蘭中場球員嘅信任。
張伯倫喺星期五，利物浦主場大勝赫德士菲 5-0 嘅聯賽正式復出。
張伯倫同利物浦嘅合約將於 2022 年屆滿，但係將會延長一年。利物浦領隊高普對呢位現年 25 歲嘅英格蘭國腳予以高度評價，並於 2017 年，於阿仙奴羅致張伯倫加盟，轉會費 £35M。
佢喺對赫德士菲嘅賽事中，後備入替韋拿杜姆，踢咗 17 分鐘，狀態不俗，並且差啲取得入球。
張伯倫將會喺利物浦大軍之中，隨隊前往西班牙。利物浦將於歐聯四強首回合，作客硬撼巴塞隆拿。
另外，利物浦前鋒費明奴希望能夠喺今日參與部份嘅操練，佢正尋求喺腹股溝傷患後，能夠趕及上陣對巴塞隆拿。
因為肌肉有輕微撕裂，未能上陣對赫德士菲嘅費明奴，渴望能夠趕及上陣。作客巴塞隆拿之後，利物浦嚟緊喺聯賽會作客紐卡素，並且喺下星期二會喺主場進行歐聯四強次回合，屆時將會再度火拚巴塞隆拿。因此，高普必須權衡相關嘅風險。
