托根夏薩特勢投多蒙特｜Liverpudlian Ty
現時效力德甲球會慕遜加柏嘅托根夏薩特，勢將於今夏轉投多蒙特。佢向比利時媒體 VTM Nieuws 表示：「我同多蒙特已經達成個人協議，我同佢哋傾過。宜家就係由兩間球會去傾，呢個係需要時間，佢哋正在傾緊。」
慕遜加柏較早前喺球會官方網站表示，托根夏薩特唔會續約，並且想為事業展開新嘅一頁。佢哋嘅體育總監艾巴爾， 更將利物浦、馬德里體育會及多蒙特等球會與托根夏薩特扯上關係。
慕遜加柏喺 2015 年，以 €8M 轉會費，從車路士羅致托根夏薩特，預料今個夏天，轉會費將會係大約 €40M。另外，托根夏薩特嘅合約，並冇解約條款。
一般相信，如果托根夏薩特成功加盟多蒙特，將會代替於夏天前往車路士發展嘅美國國腳普利錫嘅位置。
慕遜加柏本身渴望留住今季射入 11 球，貢獻 12 個助攻嘅托根夏薩特，但係佢已經拒絕續約，令到慕遜加柏能夠留住佢嘅機會唔大，而托根夏薩特同慕遜加柏嘅合約去到下季嘅夏天就會屆滿。
艾巴爾向 Sky Germany 表示：「托根夏薩特已經告知我哋，佢唔想續約。佢想喺夏天離開球會，邁向事業嘅新一頁。喺過去 10 年，我聽過呢類說話都已經有 15 次，因為有出色嘅球員離開我哋。呢個就係我哋嘅情況。」
「佢將會去邊度發展，我哋拭目以待。我唔知道會否係經常被提及嘅多蒙特，或者係馬德里體育會、利物浦，甚或其他球會。」
艾巴爾向慕遜加柏官方媒體表示：「有興趣嘅球會作出嘅轉會費報價，需要反映到托根夏薩特嘅價值，佢係一位優秀嘅德甲鋒將，並且喺世上其中一隊最佳嘅國家隊嘅常規球員。」
