利物浦琴晚主場以 5-0 大勝赫德士菲，再次以兩分力壓暫時踢少一場嘅曼城，重返榜首位置，繼續聯賽冠軍嘅爭奪。張伯倫自從喺 2018 年 4 月 24 日以來，首次為紅軍上陣，亦令人心振奮。領隊高普出席賽後記者招待會，主要內容如下：
1. 高普表示：「對我嚟講，第一個入球嚟得早咗啲！喺嗰個入球之後，赫德士菲嘅表現係唔錯嘅，我哋需要作出防守，我哋喺完美嘅時刻取得呢啲入球。」
2. 高普話：「啲人會預期拿比基達嚟到，喺第一日就會展現出佢所有嘅嘢。佢需要時間嘅，佢需要呢啲時間，宜家佢能夠展現其本色。肯定嘅係，喺好多方面嚟講，今場係佢表現得最好嘅賽事。」
3. 關於張伯倫，高普表示：「喺咁長嘅養傷及康復嘅時間，我哋嘗試對佢嘅情況小心地作出處理。宜家佢準備好喇，真係一件好事嚟。如果嗰球波佢可以入到嘅話，本應會係今季嘅最佳入球。」
4. 高普話：「文尼經常都好有能力，但係佢嘅意識同心態更加似係一個創造者，猶如將一度門打開嘅人咁。我唔肯定自從米高佐敦之後，有冇人仲可以跳得咁高！」
5. 高普認為：「91 分，呢個係瘋狂嘅，但係呢個只會係因為球員本身踢出佢哋嘅足球，仲有佢哋嘅態度同埋意識，先至能夠將呢個分數成為可能。點解我哋要去諗曼城幾時，或者邊場波會失分呢？我哋將會作客紐卡素，到時會係佢哋今季最後一場嘅主場賽事，呢個反而係更加重要，我哋應該要做好準備。」
6. 高普話：「你唔能夠喺度請求命運或者運氣嘅來臨，你係要作出努力嘅。」
7. 高普話，雲迪克情況良好。至於費明奴，高普表示：「佢比賽前嗰日操練係完全正常嘅，然後佢感覺到肌肉有少少問題，係一個非常小嘅肌肉度，有小小撕裂咗。隨咗呢樣嘢之外，所有嘢都好正面。佢可能趕得切喺星期三嘅賽事，頗有可能嘅。」
