高普：今季非聯賽衝冠最後嘗試，別忘了上季我們落後25分 | Liverpudlian Ty
隨著曼城作客以 2-0 輕取曼聯之後，現時利物浦同曼城都踢咗 35 場聯賽，紅軍仍然以一分之差落後。今季聯賽冠軍嘅爭奪，已經去到最後衝刺嘅階段，利物浦會喺主場迎戰來季降落英冠嘅哈特斯菲爾德，屆時必須全取三分，保持爭標機會。領隊高普出席賽前記者招待會，主要內容如下：
1. 關於曼徹斯特打吡戰，高普表示：「戰果係我嘅意料之中，曼聯已經嘗試咗佢哋可以做嘅事情。佢哋曾經有欠運嘅時候，但係之後已經抵擋唔住曼城。」
2. 高普話：「如果我哋喺之後兩場嘅賽事取得勝利，咁到時就要去到最後一個賽日決定聯賽冠軍誰屬，到時將會相當特別，呢個就係我哋專注緊嘅嘢。」
3. 講到沙拿成為《時代》雜誌嘅全球百大最具影響力人物，高普話：「沙拿係一個非常聰明嘅人，同埋非常具影響力，佢激勵咗其他人。佢喺嗰日著上燕尾服，睇落非常之正，嘩！佢有一課冇操，但係將於今日進行操練。如果佢問我嘅話，我會出席架！」
4. 高普表示：「我哋唔會羅致恩薛尼 (Lorenzo Insigne)。佢係一位非常好嘅球員，同埋佢同拿玻里有一份長約，我哋唔會作出嘗試。」
5. 高普話：「嚟緊呢個夏天，是否將會係利物浦歷來最大嘅轉會窗？可能唔係，但係我哋嘅眼界係經常保持開放嘅。」
6. 高普表示：「今次係我哋第一次嘗試成為冠軍，唔係最後一次，上季我哋落後 25 分。我哋一切都良好，並且會繼續努力，到最後只有一隊將會成為冠軍。」
7. 高普話：「赫德士菲、紐卡素同埋狼隊。我哋唔需要為呢個賽季作出總結，只要我哋竭盡所能，就已經無悔，呢個就係我哋整季所做嘅嘢。」
8. 談及十二碼，高普表示：「占士米拿喺呢啲時刻，就好似機器一樣，佢擁有足夠嘅經驗。佢經常面對射十二碼嘅情況，並且有正確嘅技術。」
9. 講到有四名利物浦球員，入選英格蘭職業足球員協會嘅英超最佳球隊陣容，高普認為：「對於我嚟講，我嘅球隊就係今季嘅最佳球隊。喺我嘅角度嚟睇，本來應該要再加多四個、五個，甚至六個我嘅球員入去。」
10. 高普補充：「沙拿應該值得再次入選，宜家喺射手榜處於領先位置。韋拿杜姆有一個難以置信嘅球季。如果佢哋今日投票嘅話，軒達臣應該入選。但係呢個係球員嘅決定。」
11. 被問到喺季中接手執教球會嘅挑戰，同埋蘇斯克查一定要做啲乜，先至可以令曼聯能夠扭轉乾坤。高普回應：「佢哋冇幫過我哋，點解我哋要幫助佢哋呢？」
12. 談及球隊嘅「邊緣球員」，高普表示：「呢個係我所知嘅最有質素嘅操練。我喜歡占士米拿提到米奴列，佢係英超最佳嘅二號門將，100% 係。自從上年以來，佢仍然作出唔同嘅步驟，同埋去改善自己，佢嘅態度非常之好。」
13. 高普確認，洛夫雲恢復操練。其他球員方面，會繼續觀察。張伯倫已經操練，一切都良好。
14. 高普話：「無論呢個球季係如何結束，呢個只係我哋嘅第一步。我哋嘅工作仍未完結，球隊亦唔係『製成品』。我哋會繼續努力，並且拭目以待。」
