RMC：利物浦欲斟祖奧菲歷斯｜Liverpudlian Ty
根據法國足球記者 Mohamed Bouhafsi，利物浦、曼城、祖雲達斯及曼聯，都對現年 19 歲嘅賓菲加攻擊球員祖奧菲歷斯 (João Felix) 有興趣。其中據悉曼城領隊哥迪奧拿，對呢位備受好評嘅神奇小子甚為欣賞。利物浦喺 10 日前，就賓菲加攻擊球員祖奧菲歷斯嘅事宜，作出過查詢。
祖奧菲歷斯今夏將會離開賓菲加，佢嘅合約有解約條款，金額係 €120M。但係一般相信，未至於真係要去到呢個價位先至能夠得到佢嘅加盟。
現年 19 歲嘅祖奧菲歷斯，16 歲開始喺賓菲加預備組上陣，佢可以勝任前鋒、輔鋒、攻擊中場、甚至兩翼位置。今季成為球隊嘅常規正選球員嘅佢，喺今個球季所有賽事，暫時已為賓菲加上陣 39 次，射入 18 球，並且有 9 個助攻，當中包括喺葡超聯賽上陣 22 次，射入 13 球，並且貢獻咗 7 個助攻。另外，喺較早前進行嘅歐霸盃八強對德甲球會法蘭克福嘅首回合賽事，祖奧菲歷斯更大演帽子戲法，表現相當耀眼，協助球隊以 4-2 擊敗對手。
Mohamed Bouhafsi 係法國媒體 RMC Sport 嘅記者，過往可信度甚高，其中巴西國腳法賓奴「突然」由法甲球會摩納哥加盟利物浦，就係由佢率先披露。總而言之，祖奧菲歷斯喺今個球季之後嘅去向，相信將會係嚟緊夏天轉會窗嘅其中一個看點。
此外，Mohamed Bouhafsi指利物浦喜歡里昂中場球員艾奧亞，但係呢個時候未有實在嘅討論。歐洲好多球會都注視緊佢，但係相信可以留意喺 5 月份開始，有咩關於佢嘅消息，或者進一步嘅事態發展。
