馬體會欲向利記收購古積？｜Liverpudlian Ty
根據 ESPN 所得到嘅消息，馬德里體育會想羅致效力利物浦嘅塞爾維亞中場古積，但係利物浦索價 €40M。
由於根據 ESPN，以及 The Telegraph 嘅 James Ducker 報道，曼城想啟動高達 €70M 嘅解約條款，羅致馬體會中場球員洛迪 (Rodri)，因此馬德里體育會睇中古積，將佢視為可能嘅代替對象，係可以理解。
古積今季外借往德甲球會哈化柏林，表現不俗，上陣 19 次，射入 4 球。
但係呢間德國首都球會，近期喺德甲聯賽嘅表現麻麻，意味著佢哋來季可能會無緣參與歐洲賽。
被今季結束後離任嘅哈化柏林領隊戴達，譽為「球會近 20 年來最佳中場球員」嘅古積，或有可能透過轉投馬體會，喺歐聯賽場展現其能力。
古積喺 2016 年 1 月，由貝爾格萊德紅星隊加盟利物浦，喺領隊高普麾下只係後備上陣咗 8 次。
及後喺 2017-18 年，古積外借往當時仲係英冠球會嘅卡迪夫城，協助佢哋升上英超聯賽。舊年 8 月開始，外借往德甲球會哈化柏林一季。
