錢買不到勝利：神戶勝利船點收科｜李聲揚
舊年（2018年）3月，我去咗神戶，順便入咗場睇我一生人第一場J League（日職）。其實冇乜咁大不了， 日職好易買飛，行入便利店已經搞掂，唔貴（唔記得幾錢，證明唔貴），亦大把飛買。
睇嘅係神戶勝利船主場對大阪櫻花嘅「阪神打比」。當然入場嘅原因唔係我特別鍾意日本隊或日職（雖則我好似第一季已經在有線睇），而係因為前德國國腳普度斯基加盟。當日佢正選上陣，仲有入波添，值回晒票價。
非官方統計，呢一刻最多香港人關心嘅日職聯球會，必定係神戶勝利船。原因唔係同神戶有乜親，亦唔係隊波點勁（中游位置咋，亞冠都冇得打）。而係因為多球星。乜球星？就梗係唔係本土球星（日本頂級球星多外流，留意對家嘅山口螢係少數我識嘅日本球星，結果後來去埋神戶勝利船），係外國月亮。
事隔一年多啲，已經兩回事。當時我以為普度斯基加盟已經夠巴閉，喂，世界盃冠軍隊成員喎，當年世界盃最佳青年球員喎（C朗都第二咋），而且未係老到真係養老嗰種，今年先三十三。仲要係破紀錄咁高人工，全日職最高薪。
點知沒有最勁，只有更勁。一年前，都係得啲德國球迷講。一年後，更加多人講，因為神戶勝利船有VIP組合，P就普度斯基．VI何來？仲有西班牙嘅韋拿（踢法似陳七嗰位），同埋恩尼斯達。兩個都一樣係世界盃冠軍隊成員，甚至比普度斯基更出名。
踢落點？就梗係唔掂啦，中游位置，最新三連敗。呢方面我係矛盾嘅，當然信市場嘅，大家都知最後都係金錢足球（例如上篇講阿積士），有錢玩晒。你講錢買唔到成功，假嘅。偶然你有一季一兩個聯賽係咁（李斯特城？），但你拎大形勢嚟講，錢多自然就有冠軍。講嘅錢唔一定亦唔止係轉會費，仲要係人工。名牌球星，邊有話低人工？邊有懷才不遇underpaid或者老細唔識貨？
但另一方面，人性都鍾意鋤強扶弱，見到億萬大軍唔掂，大家當然都心涼，you can’t buy class。
神戶勝利船並非日職傳統強隊，任何時期都唔係。由升班上嚟都係中游位置多，上年亦不過係排第十。呢一刻仲樣衰，VIP組合下，而家排第十一。最新三連敗，教練炒咗，普度斯基亦都辭任（我估係畀人迫）隊長。
神戶勝利船點解踢得咁差，留返啲專家慢慢講。即使VIP三個都三張幾，話唔夠班踢日職，應該幾難相信。神戶本身都係中游隊伍，原本戰績唔算失禮，但失禮在請三個勁人，同埋，佢地用嘅錢，全日職最多。到底條數點計？點收科？
Top 150 annual salaries of J.League (J1 division) players in 2018 – How much is it in Tokyo?
J. League stands for Japan Professional Football League. It has three divisions, J1, J2, and J3. J1 is the superior rank division. The following table shows the top 150 annual salaries among J.League palyers in 2018. No. Player Age Pos. Salary, Yen Salary, $ Salary, Euro Club 8 Andrés Iniesta Luján …
頭先講過，普度斯基加盟神戶勝利船時，已經係全日職最高薪，仲係離晒罩咁高。佢拎嘅人工係6億4（日圓，下同）。而其他隊根本冇一個人有4億人工。排佢下面嘅係名古屋鯨魚嘅巴西Jo，踢過曼城愛華頓嗰位，3億半。之後係澳洲龍Langerak，又係名古屋，2億，此人踢過多蒙特同史特加。兩個人工加埋都未夠普度斯基一個。
Salaries of J.League Vissel Kobe Players in 2018 – How much is it in Tokyo?
The following list shows the annual salaries of J.League Vissel Kobe players in 2018. Updated on May 25. No. Player Age Pos. Saslary, Yen $ Euro 8 Andrés Iniesta Luján 34 MF 3,206,254,625 29,267,500 25,000,000 10 LUKAS PODOLSKI 32 FW 640,000,000 5,978,240 4,828,160 11 LEANDRO Montera da Silva 33 FW …
但，同小白恩尼斯達比，普度斯基份人工真係零頭。恩尼斯達拎嘅係，32億，普度斯基5倍咁滯。呢個人工唔只係日職最高（廢話，之前普度斯基已經最高），放入全球都好似入五大，甚至高過C朗。
放埋去，韋拿嘅3億半人工，就好似唔係咩特別。不過當然亦代表全日職五個最高人工，神戶勝利船佔咗三個。唔止，其實韋拿嚟之前，神戶勝利船都係五大佔三，拎嗰位係國家都冇入過，三十四歲嘅Leandro，今季去咗東京綠茵。
J.League Club Payrolls, 2017 – How much is it in Tokyo?
Japan Professional Football League (J.League) has 18 clubs in J1 division which is the superior rank division. The following table shows the breakdown of clubs’ payrolls. Rank Club Yen $ Euro 1 Urawa Reds 1,149,800,000 10,532,168 9,812,393 2 Cerezo Osaka 1,001,100,000 9,170,076 8,543,387 3 Vissel Ko…
比多個角度，睇下神戶勝利船啲人工有幾誇張。記住IPV，32/6.4/3.5億人工。佢地未嚟之前？神戶勝利船全隊都未夠10億人工。—但人工開支已經係第三高。頭兩隊浦和紅鑽大阪櫻花都係講緊11億左右。
2019年「ヴィッセル神戸」 サッカーJリーグ チーム別年俸ランキング｜サカマネ.net
null
咁我地向前看，而家神戶勝利船，VIP齊腳後，講緊49億人工開支。繼續多過二三四位加埋（浦和紅鑽15億，川崎前鋒14億，鳥棲砂岩13億）。而川崎前鋒係拎冠軍嘅，成隊加埋都未夠恩尼斯達半份糧。
2019年 サッカーJリーグ チーム別年俸ランキング｜サカマネ.net
サッカーのJリーグ所属チーム別の年俸情報を掲載。各Jリーグチーム毎に選手の年俸をランキングとして掲載しています。
講咗咁多，好似有違我右翼嘅本色。關你鬼事咩，人地覺得值咪值，計到條數咪得，你畀錢咩？你係老細咩？
係，有人畀錢，但咁並不阻止大家笑佢係水魚。你見到大陸佬拎三千萬去叫141都會笑。總有人以為條數計得掂，我地又睇下點？留意今年7月尾8月頭。
以下呢個好東西，日職近年每年都出每間球會（唔係賽會本身）嘅收支表之類，上次係2018年7月31日出。當時都引起大陸不少討論。因為中超雖則球星多戰績好（其實係好過日職的，嘻），但係燒錢遊戲，老細足球。日職呢，咁多間球會冇一間輸錢喎，真係好榜樣，云云。成份pdf在呢度，你慢慢睇。
null
null
可惜係舊數，神戶勝利船嘅人工「不過」係31億，仲話可以收支平衡呀下。睇下去到今年又點，可以大包花生。但睇返舊數先。
2017年，神戶勝利船嘅人工開支（チーム人件費）「只係」31億，但都大幅拋離平均嘅19億。仲有啲 selling, general and administrative expenses SGA（販売費および一般管理費） 特貴，唔知點解，估計係非球員教練嘅開支，多其他友掛。
好啦，關鍵，你話，啲收入冚得返。真係？睇點睇。固然既然佢係收支平衡，咁by definition當然係冚得返，但有幾大水份？又持唔持續到？你睇神戶勝利船，冇錯收入（ 営業収益）都係全日職最高，53億，但唔似人工咁拋離，日職平均係41億。
好啦，佢一大舊係廣告（ 広告料収入），34億，日職平均18億。講到呢度大家都知，點解神戶勝船咁多錢洗？樂天（唔係韓國樂天 Lotte，係日本樂天 Rakuten）嘅球隊嘛。咁咪左袋交右袋，贊助多啲咯。情況其實同曼城PSG啲中東球王足球差不多，航空公司又佢嘅，隊波又佢嘅，左袋右袋啫。
但呢度其實有幾個問題。首先歐洲都行FFP，Financial Fair Play，係咪冇牙老虎另計，但至少啲球會都要諗辦法收支平衡。最常用嘅就係呢招，巨額贊助。人地贊助曼聯畀1億我贊助曼城畀100億吹咩？當然話會捉，又會去睇返係咪市價，貓捉老鼠沒完沒了，但你話完全冇王管又係假嘅。
第二，當然係其他球會嘅諗法。衰啲講句，正係因為神戶勝利船燒完咁多錢都唔掂，對手先樂於唔出聲，仲可以自high講you can’t buy class。到神戶勝利船（如果）真係掃晒呢？你估啲友出唔出聲？定玩你都得點解我唔得？
呢度返到第三個問題。有講法話其實其他球會都好歡迎，搞旺個市，加大競爭力（日職在亞洲其實往往屈在韓職中超之下，都話因為日本球員會去歐洲，同埋日職在pre普度斯基年代人工唔高）。你搵樂天我咪搵熊仔餅咯。但呢個係咪日職會方想見嘅嘢？我相信唔係。
夠老嘅應該記得，其實樂天呢種玩法，N年前嘅日職咪做過咯。當時一樣請一大堆過氣球星，列巴斯基連尼加薛高（冇記錯？）之類。當時咪又係全部係企業玩意。川崎讀賣，柏市日立，橫濱全日空，古河市原，磐田山葉，全部係企業冠名贊助。做乜而家冇晒？就係因為禁晒。到日職開始上軌道（亦有話因為去到中間谷底），就唔畀玩企業足球。唔畀冠名贊助，亦都要求啲球會係自己獨立可以生存嘅，唔係靠企業科水吊住，否則企業一唔玩你隊波就收得皮。呢種做法其實係大勢所趨，你見歐洲都唔鍾意，費事好似啲俄超（安捷／辛尼特）或者西甲馬拉加咁，老細／企業一唔玩你就收皮甚至冇糧出。而家樂天嘅玩法，其實係倒退返去幾十年前。
咁你話，會唔會神戶勝利船可以自給自足？我就好有保留。樓上條數不過係31億人工，到而家去到49億點算？當時已經係靠天價左手交右手嘅贊助吊住。咁你話樂天大把錢，咪再贊助多啲。理論上得，但睇返樓上講嘅三樣嘢咯。總會有一日有人出聲，或者有股東覺得搵笨，或者足協會嘈，或者其他球會嘈。
J1 League 2019 – Attendance
J1 League 2019 ” Attendance ” Home matches
你話搞旺其他收入？就更加得啖笑。冇錯樂天接手後，玩VIP後，係多咗好多追星族（例如本人）入場睇波。反正神戶交通方便，亦係旅遊景點。但，其實帶嚟嘅幫助，唔係太多。唔好忘記日職本身呢幾季都係越嚟越多人睇。
況且，上一季（2018）你都見到入場人數係大升，但去到今季似乎已經無以為繼，冇乜增長。
你睇返神戶嘅入場人次，其實都係中游。樓上條大數入場費（ 入場料収入）5億，其實仲低過平均（8億），最近呢兩季應該好啲，但幫到幾多？頂多夠畀韋拿份糧，但恩尼斯達就唔知點返嚟。
其他收入方面， 阿公分錢（Ｊリーグ配分金）都係主要來源，我理解連電視收入都去埋呢度（因為冇一個咁嘅項目）。斷估係跟排名？收入4億5，同平均差不多，中游份子嘛。
其他數字更加濕星。唔講唔知原來青訓學院（アカデミー関連収入）都係大收入，大約係開班水啲小朋友嚟做資優兒童踢波咁，但不見得有咗球星就多咗人報。賣嘢（ 物販収入）情況都差不多。
總之，睇下今年7月尾8月嘅情況。樂天照計點都頂到神戶勝利船收支平衡。入場人數真係多咗（但主要係上季，今季好似已經見頂），呢度肯定有進帳，但，你估夠唔夠冚啲天價人工？我就唔多樂觀啦。
事實就係，日職根本就唔應該畀咁高人工。呢啲人工係中超水平（其實高過中超）。但你估唔到嘅係，中超球會啲收入仲高過日職。（咁點解中超球會啲財政咁差？因為日職只係神戶勝利船一家咁玩，但中超間間都咁高人工）
你可以話睇長線嘅，樂天贊助埋巴塞添。你見佢又搞埋啲友賽恩尼斯達韋拿倒戈巴塞，又可以學曼城紅牛咁搞衞星會，巴塞球星退休就過嚟搵日本真銀，日本球員可以去巴塞之類。又或者，恩尼斯達都係玩多兩年啫，到佢走咗人工開支自然低返。但個品牌仲在嘛（希望）——不過，冇晒VIP嘅勝利船，仲keep到咁嘅觀眾人數？
順手講埋，另一隊香港人多講嘅日職球隊，就係鳥棲砂岩。因為有費蘭度托利斯。呢啲不毛之地更加唔知乜水去睇波，可能得啲死硬球迷去。8億人工，已經一半球會成隊夾埋，而我更加唔知費蘭度托利斯帶到乜商業效益去鳥棲。當然鳥棲砂岩啲總開支冇勝利船咁跨，其他人好奀，成隊13億，都未夠恩尼斯達一條友一半。問題係鳥棲砂岩仲要包緊尾，條數我更加唔知點計了。
今次用嘅數字比較多，總會有啲打交或矛盾，勿小。另外唔識日本，我知大撚把專家，譯錯勿小，唔鍾意嘅自己寫篇啦下。
________________________________________
今次引用不少數據，有啲site 都幾好用，照列如下，等你唔使問我啲數字邊度嚟，同埋第時都會有用：
www.worldfootball.net/attendance 聯賽入座數字
www.soccer-money.net/team/in_team.php 球會人工開支
big.big.or.jp/~kato/hatena/football.html 都係球會人工開支
nbakki.hatenablog.com/entry/JLeague_Club_Payrolls_2017 呢個十分好用，仲有一大堆其他日本嘅統計
當然仲有萬能嘅維基百科，同埋日職官網，都好多嘢睇。
