利物浦琴晚作客以 2-0 擊敗卡迪夫城，取得重要嘅三分，繼續保持爭奪聯賽冠軍嘅希望。領隊高普透露，佢為咗準備對卡迪夫城呢場波，有特別嘅計劃同埋準備功夫。
高普透露，利物浦大軍之前喺 Melwood 訓練時，特登唔剪球場嘅草，亦都唔淋水，以便應對卡迪夫城場波會遇到嘅困難情況。
利物浦憑著韋拿杜姆同占士米拿嘅入球，以 2-0 擊敗卡迪夫城，重返聯賽榜首。
利物浦球員為勝利而努力。但係，主隊球員嘅防守紀律同埋難以應付嘅草地狀況，令到事情變得一啲都唔容易。
不過，高普喺賽前就為球員對呢啲情況作出準備，以便幫助啲球員應對呢類情況。
高普向 Skysports 表示：「琴日 Melwood 冇剪草，亦都冇淋水。」
「明顯嘅係，呢啲情況係會發生嘅，只係睇啲人點樣做同埋應對。情況係好困難嘅，假如我哋對於呢啲情況感到驚訝，咁係無濟於事嘅。」
「所以琴日我哋喺球場草地曬水之後嘅 1 小時 10 分鐘先至開始操練。」
「呢個做法係主要想確保你唔好對環境感到沮喪。事情唔會容易地發生，你要 100% 認真應戰。班球員當時做到呢樣嘢，我哋係值得攞到呢三分嘅。」
由於喺比較黏嘅草地上，要進行順暢嘅互相傳球會比較困難，當時可能無可避免地要用死球嚟打開紀錄。呢個死球亦都「運作良好」，韋拿杜姆出現喺一個足夠嘅空間，用右腳射破對方守門員嘅十指關。
高普話：「我哋花咗好多心機喺死球方面，上半場嘅表現並唔差。」
「球員明顯地知道應該點樣去處理個角球，如果你作出嘗試同埋置身於球場之中，冇一個鏡頭嘅角度會好過你自己嘅，所以佢哋決定咗開一個比較平嘅波，然後由韋拿杜姆走去嗰個地方出現。」
「當時所見，係人盯人嘅狀況，同埋如果有三個球員被人緊盯嘅話，咁你咪加上第四同埋第五個人落去，然後佢就會無人看管。」
「明顯地，當時韋拿杜姆就係無人看管，但係都要射到一個咁嘅波先得。呢個係一個精彩嘅入球，我喜歡。」
