跟紅頂白，一沉百踩：德甲今季根本唔差，只係拜仁差｜李聲揚
（自己FB 舊post bit.ly/2UPrjTb 今季拜仁先係德甲之恥，沒有其他）
Ivan Li
［今季拜仁先係德甲之恥，沒有其他］又做系數拎。但睇頭條今年德甲好似好樣衰，三隊畀人十六強踢出局，仲要係畀英格蘭。不過，真係樣衰嘅只係拜仁。其他隊其實一向係咁上下水平。你睇返分數就知，德甲而家仲未死晒（未架！），今季拎分14.5。 法蘭克福行到幾遠唔知，但我就當佢兩回合輸晒出局，14.5分，其實德甲拎分同13/14…
你印象同現實真係兩回事，上一篇（上面嗰段）一個月前寫，正係德甲三隊十六強一齊出局，一沉百踩。
但事實，真係核突嘅只有拜仁慕尼黑，其他隊一向係咁水平。
講到好差咩？德甲仲未仲死晒（未架），我當法蘭克福對車路士輸晒出局，德甲今季拎分都近14.9。
14.9咩概念？其實往年德甲都係咁上下，你睇總分（五季）71分亦都知，平均就係一季14分咁上下，今年甚至叫做比平均好添。
但肯定之前每一年，都係拜仁拎分最多，仲係拋離晒其他。多蒙特外，其他隊（例如史浩克）根本就係歐聯爭第三嘅水平，出到十六強超額啦。
今年就更加唔同，德甲平均分唔差，但拜仁自己N年最差，更顯出其他隊交足功課有突。今年拎分最多係法蘭克福添！幾多年冇試過唔係拜仁？
而你同其他聯賽比，亦見到係咁上下，德甲冇特別差到。之前講到意甲點復興，但又睇下數字。
Hi你，意甲今年先12.6分，低過德甲一截，仲要已經出晒局（拿坡里祖雲達斯）。唔得閒計，但其實就算我比你祖雲達斯拎歐聯、拿坡里拎歐霸，分別都唔係極大。因為其他隊太屎。
你講意甲勁？上一季先真係勁，加上上季德甲太頹，個差距係上季拉開的，唔係今季咯，今季根本就德甲高分啲。
（另外14-15意甲其實仲高分，但嗰屆德甲都不差，甚至高過英超）
拿，德甲今季嘅14.9分，根本意甲過去五年有三年都拎唔到。英超就一季都係呢個分，兩季係低過。近兩年就當然勁。西甲就唔使講，超班的。
另外睇埋四大之外，法甲始終同四大係有啲距離。係多得多黎聖日門一隊獨大，其他嗰啲都係唔多入流。睇分數都知，你法甲五年先58分，同德甲意甲都爭十幾分。反而你領先俄拎都未夠十分。
咁當然法甲單季邊會去到頭四，但其實都真係，叫做四大好似適合過五大，你講成個聯賽法甲真係近剩返嗰堆多過頭四。
至於荷蘭嗰啲，之前啲文都講過，結構性問題，死症嚟的。你睇個表都知阿積士識飛都好，今屆而家荷甲先8分多啲，甚至未及16/17。你話想打上頭五，真係近乎不可能。
最後教訓幾個：
第一，就唔好只係睇啲大會。唔好因為一隊阿積士就當荷甲可以復興，人唔笑狗都吠。阿積士固然打得好好，但獨力難支的。正如PSG講到點勁（其實有幾勁？），但你睇法甲分數，真係五大之中特別落後。往往係啲細會外圍賽出局累死你成個聯賽，或者係啲細會爭氣出到線救到你。
第二，其實同第一點差不多，唔好只係睇四強決賽邊隊捧盃。你睇德甲十六強歐聯香晒以為今年好頹添。但頭先都討論過今年根本唔差，差嘅係拜仁，其他超晒額。
第三，都係睇數字客觀啲，破除好多迷思。包括呢個「德甲除咗拜仁都係唔掂」，有眼你睇，其實其他隊相當唔錯。當然個問題係其實其他隊出到線已經係叫「唔錯」。但即係，位就十六個，班霸一堆，你求都數到十隊八強年年有份，你估出線咁易？同樣地，呢個「西甲中下游唔掂」都係迷思。只係皇馬（今季之前）巴塞太L勁，其他普通勁，你就以為唔勁。你睇西甲啲分真係長期都超班。呢兩季係低過英超，但至少英超都未做到佢地咁季季近20分。就唔係兩（三）隊大會獨力支持到的。
第四，都係循例hi兩句。覺得睇呢個系數唔準嘅，自己整套咯。我話知L你唔順超，你本人最L醒。現實係所有歐洲球會大家坐低都「達成共識」，而呢套嘢亦主宰啲球會命運，你個個唔順超最後都要跟。我記得十幾年前意甲踢到一pat屎啲意拎都仲感覺良好話啲球會唔在意歐洲賽，踢意甲等於個個星期歐聯（好L好笑架），咪L踢丫笨。你咪冇錢分，咪食蕉。所以歐洲足協就靠呢啲嘢去陰乾你，錢字行頭個個都要聽話。
