費基亞因轉投利記失敗解僱經理人｜Liverpudlian Ty
今季幾乎成功加盟利物浦嘅里昂中場費基亞，與經理人 Jean-Pierre Bernes 分手，可見係因為該名法國國腳未能成功加盟利物浦嘅後果。
喺上年 6 月，利物浦同意以 £48.4M 轉會費羅致費基亞，直至喺官方準備宣佈佢加盟之前嘅一刻，呢單交易胎死腹中。
加盟利物浦失敗之後，費基亞與經理人 Jean-Pierre Bernes 嘅關係轉差，呢位法國國腳渴望同經理人結束關係。
喺接受分手之前，Jean-Pierre Bernes 就此事尋求法律意見，同時暗示咗與費基亞上個夏天未能成功加盟利物浦有關。
費基亞與經理人 Jean-Pierre Bernes 嘅關係已於 4 月 17 日結束。現時已經係費基亞前度經理人嘅佢，喺星期六向 Europe 1 電台表示：「我喺星期四終止咗合約。」
「呢個係費基亞嘅選擇，佢當然將會物色一個新經理人。」
「同所有人與人之間嘅關係一樣，你周不時都會對某啲人嘅將來或者行為有唔同嘅意見。」
費基亞同里昂嘅合約，將於下個球季結束時屆滿，與里昂嘅續約談判亦已經停止，現時該法甲球會預期喺嚟緊嘅轉會窗將佢出售套現。
已經係費基亞前任經理人嘅 Jean-Pierre Bernes，質疑有邊間大球會真係有意簽下呢位現年 25 歲嘅法國國腳。
佢話：「要加入十間最頂級球會嘅其中一間，係非常困難嘅，你必須要有一個方法。」
「你一定唔可以太過倚重一個球員經理人嘅角色同職能。」
「當你有一位大牌球員，同埋有一間大球會想要佢，會係間球會想嚟見你同埋睇你。如果唔係，即係你吸引唔到其他球會嘅興趣。」
