卡列斯如何在土超重回正軌 | Liverpudlian Ty

由利物浦外借土超球會比錫達斯嘅德國門將卡列斯，起初喺土耳其渡過咗艱難嘅12 個月，但係宜家已經漸入佳境。

利物浦喺今個星期宣佈，艾利臣將於下季改穿1 號球衣。呢位巴西國腳門將喺上個夏天，以£65M 嘅轉會費，由意甲球會羅馬加盟。呢個收購相當成功，艾利臣嘅出色表現，成功奠定利物浦首席門將嘅位置，協助球隊繼續挑戰英超及歐聯冠軍。

艾利臣嘅表現，已經令佢成為「世上最佳門將」嘅討論對象之一，與奧比勒、達史迪根、同埋迪基亞相提並論。

但係卡列斯嘅情況又係點嘅呢？

當利物浦競逐英超及歐聯冠軍嘅時候，卡列斯正在透過外借比錫達斯，尋求重建自己嘅信心，同埋聲譽。

卡列斯喺利物浦嘅日子，令人記得嘅當然包括咗上季嘅歐聯決賽，同埋佢嘅犯錯令球隊付上沉重嘅代價。利物浦喺歐聯決賽落敗後，卡列斯哭成淚人。及後亦出現咗佢喺賽事嘅下半場有腦震盪嘅說法，令佢喺及後嗰幾個星期，一直成為焦點。上個夏天，對於現年25 歲嘅卡列斯嚟講，絕對唔好過。

利物浦領隊高普起初嘅計劃係將卡列斯留低，成為艾利臣嘅副手，並且放走米奴列。但係米奴列並唔係咁容易放走，佢當時比較想去拿玻里，並且拒絕加盟富咸，加上卡列斯喺季前熱身賽嘅接連犯錯，所以最終決定俾佢離隊，從而令佢嘅思緒可以清醒及整理，重新開始。

土超球會比錫達斯借用卡列斯兩年，佢哋會先俾£2.25M，如果喺借用期間，達到一啲同出場次數同埋表現相關嘅條款的話，該土超球會就要再俾£7.25M 將佢買斷。

卡列斯起初喺比錫達斯嘅情況並唔係咁理想，雖然佢經常成為正選，次數比佢上季喺利物浦嘅次數仲要多，但係佢嘅失誤成為焦點，同埋備受批評。

即使係比錫達斯領隊根尼斯，亦都對卡列斯作出抨擊。喺上個月，根尼斯指控卡列斯嘅情況「停滯不前」，更加話佢對賽事嘅「熱誠同埋動力」有問題。呢位領隊仲聲言，如果另一位門將杜加可以上陣嘅話，就唔會再起用卡列斯。

呢種人事管理嘅方法，可謂相當有趣。當時卡列斯已經喺26 場聯賽之中，上陣咗25 場。唯一一場佢冇正選上陣嘅賽事，就係11 月作客輸俾施華斯。另外，喺6 場歐霸盃分組賽事，根尼斯有5 場都係俾卡列斯上陣。

喺同一段時間，比錫達斯欠卡列斯四個月嘅薪酬，佢要求國際足協介入，甚至有傳聞聲稱，佢最後要返回利物浦。

然而，呢樣嘢係唔會發生嘅。因為喺協議之中，並冇球會終止借用，或者球員提早離開嘅條款。另外，利物浦會方相信，有關卡列斯及比錫達斯之間，關於薪酬嘅問題，已經解決咗。利物浦同卡列斯及經理人緊密對話，並且得到比錫達斯嘅保證，唔會再有其他問題。對於領隊根尼斯作出猛烈抨擊嘅感受，亦已向比錫達斯方面反映。

或者令人唔感到驚奇嘅係，最近卡列斯嘅表現同狀態都有所提升。喺上個星期，比錫達斯主場擊敗榜首球隊巴沙克舒希嘅賽事中，卡列斯發揮重要嘅作用。利物浦體育總監米高愛華士，同埋負責跟進及支援外借球員事宜嘅祖利安華特亦係座上客。呢場勝仗令到比錫達斯仍然可以繼續爭取來季嘅歐聯參賽資格，佢哋喺聯賽暫時落後宿敵加拉塔沙雷3 分，尚餘6 場賽事。

據接近卡列斯嘅消息指，佢宜家喺伊斯坦堡感到開心，已經適應及安頓落嚟。佢嘅女朋友喺佢身邊，加上有機會效力比錫達斯呢類球會，亦都預期會有唔少出賽機會，對佢喺歐聯決賽嘅惡夢後，重建自己信心，會係關鍵嘅因素，佢今季一定唔會對壓力作出迴避或者退縮。

此外，比錫達斯現任領隊根尼斯將於今夏離隊，再次執教土耳其國家隊，卡列斯期待會有一個新嘅，以及更為寬容嘅領隊。據悉最有機會嘅人選包括巴沙克舒希領隊鴨都拿阿維斯，仲有前西班牙國腳及皇家馬德里球員古迪。

無論最後係邊個成為比錫達斯嘅新領隊，我哋將會見到一個同以往記憶中唔同嘅卡列斯。佢可能永遠冇機會為利物浦作出補償或者自我救贖，但係喺過去嘅12 個月，佢嘅事業陷於谷底之後，宜家已經重返正軌。

Liverpudlian Ty