從視障人士被誤認賭波集團成員的風波說起 | 足字室
足字室按：最近和富大埔擊敗航源，係一件香港球迷值得慶祝的事，但場內入面的小插曲，亦好想同各位室友分享，更甚係希望香港足球總會可以正視一下。
文：中堅賓(授權轉載)
（文章標題為體嘢編輯另擬）
旺角大球場正上演亞協杯大埔對航源
看台上出現以下對話：
「點解佢用望遠鏡睇波？」
「佢仲貼到塊面好近咁睇電話，係咪有咩秘密？」
「條友好可疑，肯定係賭波集團成員」
於是義憤填膺嘅球迷向足總職員投訴，更召來警察帶走「賭波集團成員」。
我知道各位球迷對於「打假波」深惡痛絕，所以見到有人用望遠鏡睇波，就會覺得奇怪、可疑，為左香港足球嘅健康發展，當然要舉報啦。
之但係，有無諗過其實拎住望遠鏡睇波嘅朋友，原來只係一位嚴重弱視嘅球迷。先天嘅眼疾無阻佢對足球嘅熱情，為左要清楚了解球賽過程，望遠鏡幫到佢追蹤皮球嘅動向，亦都睇到球員們嘅動靜。佢帶住呢支望遠鏡入場，從不缺席任何一場港隊以及亞洲杯賽賽事，亦不時入場支持港超。
好可惜，亦係呢支望遠鏡為佢帶來幾次不愉快嘅經歷，側邊球迷嘅難堪說話、保安的留難、以及係足總同警察嘅盤問。今場波都唔例外，因為亞協係劃位嘅，雖然警察同足總職員睇完佢嘅殘疾證之後，還佢清白。不過，亦都無同佢周邊嘅球迷解釋，為左唔想响冷嘲熱諷之下欣賞比賽，佢唯有半場就走人。
屈辱過後，呢位朋友無怪任何人，佢只係覺得呢件事再次證明香港社會對殘疾人士依然有唔小誤解，最簡單嘅係健視嘅人依然可能好難想像盲人點樣，甚至係點解要睇波，因為睇到野嘅人會想像自己如果盲左，就會做唔到好多野，就會係世界末日。但係視障人士自有佢地嘅方法去享受一啲大家覺得好平常嘅事，包括睇波。弱視朋友會用望遠鏡、全失明朋友可以聽住旁述，加埋現場環境聲音，一樣可以投入賽事。
足球無分界限，你欣賞得，盲人一樣可以，只係用嘅方式，响大家眼中有啲奇特，亦有啲難以想像。希望拙文簡單介紹之後，遲啲大家响球場見到有人拎住望遠鏡睇波時，唔好再大驚小怪，有唔明，好歡迎大家直接對話，無須單單打打。至於足總，希望可以加強對前線同事嘅教育，球場內應該係要有各式各樣嘅球迷，唔係又點樣做到全城撐港隊呢？
至於，真嘅賭波集團當然要嚴打，不過乜賭波集團成員有樣睇嫁咩？我諗至少無規定要啲成員拎望遠鏡入場吧？要打擊打假波，叫球員把持得住好似緊要啲吧？
室友可以睇下歐洲足協點樣為視障球迷帶來更好嘅觀賞體驗：www.uefa.com/insideuefa/social-responsibility/news/newsid=2537037.html
作者為香港失明人協進會 Hong Kong Blind Union同工。
