由今年二月開始外借往巴甲球會富明尼斯嘅巴西中場球員阿倫洛迪古斯（Allan），自從喺 2015 年由巴甲球會國際體育會加盟利物浦以來，由於未能取得英國工作證，所以至今仍然未能為紅軍上陣，一直被外借往其他球會。
現年 22 歲嘅阿倫洛迪古斯，向巴西媒體 Globoesporte 表示，現時喺富明尼斯感到開心，希望可以延長留低嘅時間。
阿倫洛迪古斯話：「對我嚟講，我希望留喺度兩年，或者三年。」
「但係呢樣嘢並非只係取決於我。我想留低，並且展現我嘅足球。」
「我希望同富明尼斯嘅借用協議能夠長一啲。我喜歡呢間球會，同埋呢個城市，我想留喺度。」
