[金錢世界] 阿積士一剎那光輝，係咪周永恒？| 李聲揚

真係呢，永遠都有新嘢學。實在唔係荷蘭粉（我捧佢地死敵喎），所以一路都唔知阿積士都係上市公司。昨日掛住睇祖雲達斯股價，都冇為意阿積士。

昨日都寫過啦，祖雲達斯出局後，股價插水近兩成。另一邊嘅阿積士差不多升10%。你見阿積士三個月累升成兩成，祖雲達斯就打回原型。

但馬後炮講，其實祖雲達斯唔應該跌咁多，或者阿積士唔應該升咁少。純理論嚟講，而家呢個位肯定係做一個pair trade: long 祖雲達斯 short阿積士 嘅market neutral，照計市升又贏又跌又贏，至少對沖基金佬咁講。

點解覺得「祖雲達斯唔應該跌咁多，或者阿積士唔應該升咁少」，其實都係普通常識。首先相對阿積士而言，祖雲達斯係大會，亦係大公司。照計細公司波動應該大啲。你睇祖雲達斯都不過係14億歐羅市值，同間大家樂差不多，同名氣完全不成正比，但拍埋阿積士度就好大。阿積士？係佢四份一左右咋，一間大快活咁上下。

二來，對祖雲達斯嚟講，八強出局真係冇乜咩好大意外（輸畀阿積士就意外少少），但對阿積士嚟講入到四強就真係好意外！半年前你都應該覺得阿積士係陪跑，事實亦不過係次名出線。反而首名嘅拜仁慕尼黑十六強已出局。

咁對祖雲達斯嚟講，不過係少少set back，甚至都在預算範圍。但對阿積士嚟講就真係佢地自己都冇諗過。佢地打足三輪外圍賽先入到分組賽，亦係2004–2005嘅PSV燕豪芬之後，第一隊入到四強嘅非五大聯賽（西英德意法）球會。而你諗下十幾年間球會貧富懸殊拉濶咗幾咁多。

但你見我用個咁嘅圖，係特登誤導你的。阿積士今季當然係神奇之旅，一早超晒額。但係咪又乜乜前途無可限量主力後生，就又睇定啲先，一剎那嘅光輝唔係周永恒。

我都係悲觀，或者務實嘅。國家隊仲話偷到雞（話時話，對上一次世界盃冠軍有10倍賠率係幾時？），球會嘅嘢，基本上都係豪門玩晒，邊有咁多爆冷。阿積士去到呢步已經爆大冷。

講真，似乎抽到熱刺好過抽巴塞或利物浦，冇人敢睇死阿積士不能過多關，而碌到入決賽一場過要爆冷，反而仲易過四強。但，畀你拎到一屆歐聯又點？都係嗰句，豪門玩晒。都唔只講星散之類，你啲戰術自然會畀人睇住。我懷疑拜仁皇馬祖雲達斯有冇真係用好多時間去備戰，冇輕敵就假嘅，到你上咗神枱就人人睇住點破你。

況且，現代足球嘅嘢，最緊要都係，錢。呢樣嘢阿積士同祖雲達斯冇得比，更唔好講同真正嘅豪門比（祖雲達斯其實都算了）。錢嘅嘢，就唔係講賺幾錢，係講收入。

你係英超啲中游球會還好，你係五大以外嘅，就算大會，都係先天不足的。你荷蘭有幾多人咁大把？歐洲以外邊個睇荷超（定荷甲）？德甲意甲都冇人睇啦，何況荷蘭？時間就得咁多，你唔會因為有錢咗多咗時間（最多開住四部機），所有球會都爭你嘅時間睇佢嘅波。同樣地，本土市場唔夠大，注定你門票收入唔會多。更加唔會做到好似英超咁成為旅遊節目—邊位去荷蘭順手去阿積士主場睇波？

我知梗有人，唔使出嚟舉手，你唔係全世界，我去過現場睇馬超添。唔係馬來西亞超級聯賽，係馬其頓超級聯賽呀，真正see馬超之心。但有幾多咁嘅人？你比我去多次荷蘭，我就去海城大酒樓睇蔣生遇害紀念碑啦。

講時講，阿八指叔都係阿積士球迷（買祖雲達斯句對白係蔣生講的！），果屆阿積士就係對祖雲達斯，問你死未，最後就係祖雲達斯稱冠，阿積士今次復仇了。

你睇祖雲達斯，好簡單就係生財都OK有道。阿積士就仍需努力。祖雲達斯同拜仁一樣（其實兩間球會好似），年年有歐聯玩，錢嘅嘢長收長有。亦都叫做抆車邊做到Global Club，賣波衫門票收入之類有保證。

所以你睇，拉長少少嚟睇，講股價祖雲達斯大副跑贏阿積士。我相信之後都會係，在可見嘅將來（即係，五至十年），都仲係五大聯賽豪門玩晒。你諗下上一次非五大聯賽球會入四強，咪又係荷蘭，PSV燕豪芬嘛。之後有冇變咗皇朝？之後就冇再入四強啦，打後仲偶然有八強貨仔，但真係唔係嗰回事。而你諗下，而家比起十幾年前更加難爆冷。

不過在此之前，不妨享受下阿積士嘅足球，睇佢可以走到幾遠。反正德甲球會全數出局，我支持阿積士冇問題的。

順手講講，阿積士（間公司）嘅CEO，正係大家都識嘅一代鋼門雲達沙，當年祖雲達斯擊敗阿積士拎歐聯，正係佢守龍，不過係守阿積士龍，再之後佢先去祖雲達斯。體育總監係都相當出名嘅奧華馬斯。感覺上歐洲（特別係德國同荷蘭）啲球會在呢方面係做得好啲，畀啲忠心名將有條後路，畀佢地讀下書（話晒run間公司喎，雖然歐洲啲球員而家學歷都高咗好多），唔止係以前咁只係畀佢去教波，冇得教一隊就教小朋友咁。

（唔關事嘅後記：我一路以為古惑仔嗰場波係阿積士主場，因為見到好多球迷，仲有祖雲達斯球迷。後來諗下，決賽一回合過，中立場在羅馬，邊有主場？然後諗下會唔會係之後嗰屆，阿積士主場都對過祖雲達斯。但套古惑仔已經上埋，冇可能可以時光機）

君子馬蘭頭 - Ivan Li 李聲揚