高普：極端車迷種族歧視言行令人作嘔 | Liverpudlian Ty
利物浦喺星期日將會重返聯賽，喺主場迎戰車路士，絕對會係硬仗一場。紅軍喺爭奪聯賽冠軍路上，與曼城短兵相接，必須全取三分，保持爭標機會。領隊高普出席賽前記者招待會，主要內容如下：
1. 對於有幾名車路士球迷對沙拿所作出嘅行為，高普對此作出譴責。佢認為：「呢個係令人作嘔嘅。我哋唔應該將佢視為係車路士，或者係利物浦嘅事，呢個係另一個反映咗外界有啲嘢係出現咗問題嘅跡象。我哋對呢類事情嘅反應越強烈，就會越有幫助。」
2. 高普補充：「如果你做出呢類行為，你唔應該再次被容許進入球場。喺我嘅角度嚟講，應該要終生禁止。呢個係對人生嘅一個完全誤解，有啲人覺得，佢哋自己比其他人更有價值，呢個係世界上最大嘅誤解。」
3. 高普表示：「足球係令到唔同嘅人、種族、所有嘅嘢，如何能夠融合一起嘅最佳例子。去到世界上任何一個更衣室，我哋見到所有人都坐埋一齊，從來都唔會有問題。」
4. 高普話：「足球有一把強而有力嘅聲音，同埋我哋應該要用呢把聲音，去展現出我哋嘅諗法係一致嘅，呢類事件唔容許再次發生。」
5. 講到對手車路士，高普表示：「佢哋宜家處於一個真係唔錯嘅時刻，我哋呢個星期睇咗佢哋兩次，佢哋可以喺兩場賽事之間，作出 7 個轉變，前晚俾一啲球員休息，仍然能夠取得勝利。佢哋處於良好狀態，夏薩特嘅狀態非常好！對我哋嚟講係一場大戰，但係我哋亦處於良好狀況。」
6. 高普話：「呢個係一個好嘅時機，去展現我哋所有嘅改進。我哋宜家嚟緊嘅只有大戰，但係呢場係我哋喺呢個周末要踢嘅唯一一場賽事，我哋需要所有嘅嘢去取勝。」
7. 談及利物浦喺 2014 年對車路士嘅慘痛回憶，高普表示：「除咗你哋 (記者) 之外，我唔肯定呢樣嘢係咪喺所有人嘅腦海之中，我一秒鐘都冇諗過呢樣嘢。話俾啲球迷知，唔好理會佢，忘記佢啦，同我哋毫無關係！宜家係講緊星期日場波。」
8. 高普話：「對於星期日場波，我哋嘅態度係完全地正面嘅。我哋知道屆時需要相當努力，但係我喜歡星期二晚場波嘅情況。當時有好多良好嘅時刻，可見我哋真係處於佳態。宜家我哋要將佢再展現出嚟。」
9. 高普表示：「任何人如果想同任何一位我嘅球員去傾多年前發生咩事嘅話，請你唔好咁做！我哋要撰寫我哋自己嘅故事。」
10. 講到軒達臣，高普表示：「我哋宜家都會咁樣做。球員可以入嚟我嘅辦公室，話想踢一個唔同嘅位置，同埋佢能夠去踢嗰個位！」
11. 高普補充：「你可以見到軒達臣嘅表現真係活躍，相當充滿活力。能夠喺可能嘅情況下，俾球員去踢佢哋嘅最強位置，係我嘅工作。否則，佢哋需要去踢其他位置。軒達臣過往踢 6 號位嘅時候，有好多出色嘅表現。但係宜家，佢亦都有機會得到踢 8 號位嘅機會。」
12. 談及中堅嘅問題，高普表示：「我哋要經常作出決定。祖高美斯係一位出色嘅球員，但係佢需要時間，同埋我哋要確保佢嘅狀態係 100%。我哋可以俾時間佢操練，同埋俾啲時間佢作出比賽訓練。喺今個球季嘅最後一部份嘅時間，我哋將會需要祖高美斯。」
13. 講到利物浦球迷，高普表示：「我感覺到嗰種正能量，同埋我真係認為，有一個好大嘅轉變，由起初對於我哋今季所處於嘅位置感到驚訝，跟住習慣咗，然後越來越有信心，呢個係一大進步。」
14. 被問到對於嗰幾位車路士球迷嘅行為，沙拿有咩反應。高普話：「喺公開場合度，冇嘢想講，我哋唔會俾呢啲人多於佢哋應該得到嘅嘢。我講咗我應該要講嘅嘢，就係咁多，一個強烈嘅回應係需要嘅。」
15. 講到夏薩特，高普話：「喺一個屬於佢嘅日子，佢能夠即刻成為世上最佳。佢至今嘅球員生涯係精彩嘅，但並未完結。我喜歡佢嘅快樂同埋大膽，仲有強壯，高速，佢係一個好球員！但係所有好球員都有同我哋對賽過，我哋要嘗試所有嘅嘢。」
16. 高普又話：「我哋今次將會放 13 個球員，其中兩個會睇住夏薩特！我哋要確保佢唔能夠展現其威力，阻截對佢嘅傳送，要作出比其他球隊更佳嘅反應。當佢有球在腳嘅時候，就會已經太遲。要閱讀球賽，閱讀球賽上嘅傳送。喺單對單嘅情況下，你唔能夠防到佢嘅。」
17. 高普表示：「關於 2014 年嘅事，我一秒鐘都冇諗過，直到我入嚟呢間房為止！」
18. 高普話：「我並唔緊張，我感覺到嘅係賽事嘅緊湊程度。但係呢個時刻，我見到正面嘅嘢。當然，呢個係困難嘅。如果你想喺冇困難之下過關，你唔有呢個機會。」
19. 高普認為：「踢波嘅時候冇錯誤係冇可能嘅，所以你唔需要擔心呢啲嘢，你只需要去處理同應付佢哋。」
20. 講到連續兩場入波嘅拿比基達，高普表示：「最近呢幾個星期，佢操練嘅表現真係唔錯。所以對修咸頓場波用佢，並唔係一個大膽嘅決定，因為佢操練嘅表現就係咁好。修咸頓場波對佢真係一個激動嘅時刻，同埋佢對波圖場波取得入球，係一種純粹嘅歡樂。呢個係一個良好時刻，希望呢個美好嘅時刻會長時間繼續落去。」
