利物浦領隊高普強調，軒達臣對球隊嘅光明前景仍然非常重要，佢向呢位現任嘅利物浦隊長致敬，形容係「足球史上近 500 年來最困難嘅工作」。
軒達臣喺星期五對修咸頓後備入替，產生好大嘅作用，協助利物浦作客反勝 3-1，保持爭取聯賽冠軍嘅希望。
佢協助創造利物浦第二個入球，並且後來射入賽事嘅第三個入球，係自從 2017 年 9 月以來嘅第一個入球。
高普相信，現年 28 歲嘅軒達臣，喺 2015 年繼承謝拉特嘅隊長臂章，成為紅軍隊長，曾經因此而遇到困難嘅時刻。即使軒達臣面對外界嘅批評，高普經常力挺佢。
高普表示：「呢個入球對佢同埋我哋嘅意義重大。」
「佢係一個好好嘅球員，值得受到所有人嘅讚賞，但係並無得到太多。」
「軒達臣，喺我嘅角度嚟睇，佢係一個出色嘅球員。佢係我哋嘅隊長，擁有優秀嘅性格。」
「如果我要寫一本關於軒達臣嘅書，係需要用 500 頁嘅篇幅，所以我嘅睇法係非常正面。」
「足球史上近 500 年來最艱難嘅工作，就係代替謝拉特。一啲人嘅諗法好似係，如果唔係謝拉特嘅話呢，就係唔夠好。軒達臣對於呢樣嘢已經處理得非常之好，所以佢應該要感到自豪。」
「宜家我哋應該要諗將來，而軒達臣係我哋球隊非常重要嘅部份。」
軒達臣喺對修咸頓場波後備入替嗰 30 分鐘嘅表現，就好似一個需要證明自己嘅人一樣。佢嗰種受控兼且帶有進取嘅表現，為利物浦嘅中場增加控制力。
近年主要喺隊中司職控球中場嘅軒達臣，喺今個星期嘅較早時候，已經同高普傾過會否將佢嘅位置推前一啲，以便更能發揮同展現佢嘅天份同埋能力。
高普話：「呢類嘅表現，我之前見過佢有好多，呢個就係佐敦軒達臣，呢個就係佢。當我嚟到利物浦嘅時候，一開始去諗球隊嘅事情時，當時覺得軒達臣係一個 box to box 嘅球員。」
「我哋令佢成為一個 6 號位嘅球員，效果良好，我認為咁樣會令佢去踢唔同位置會有好大嘅幫助。我已經同佢傾過，咁並唔表示佢日後唔會再踢 6 號位。」
「佢認為呢樣嘢係合理嘅，同埋係絕對正確。我哋會踢唔同嘅陣式，占士米拿同軒達臣都充滿信心同能量，對我哋有好大嘅幫助。」
星期五對修咸頓場波，軒達臣及占士米拿起初成為後備，由法賓奴及拿比基達成為正選。相信嚟緊歐聯八強首回合，主場對波圖嘅時候，佢哋會重返正選位置。
高普表示：「我哋拭目以待。我哋宜家喺賽後要恢復過來，同埋將會為波圖場波定下陣容。」
「我哋非常有野心，並且會嘗試所有嘅方法。呢場賽事會喺晏菲路進行，係歐聯八強，對我哋嚟講，係一場大戰。」
「呢個係我哋第二年參加歐聯賽事，並唔係第 12 年，甚或其他。我哋唔係最近三屆都奪冠嘅皇家馬德里。我哋喜歡呢項賽事，並且會嘗試所有方法去贏波。」
