李察利臣經理人澄清與高普會晤與球員轉會無關 | Liverpudlian Ty
近日有媒體聲稱，利物浦對愛華頓嘅巴西攻擊球員李察利臣感興趣，甚至連佢嘅經理人都同利物浦領隊高普見過面添。但係呢位巴西國腳嘅經理人透露，係就係有見面，不過同李察利臣無關。
巴西媒體 UOL Esporte 喺星期四聲稱，李察利臣嘅經理人連拿度維拉斯高（Renato Velasco）去到高普嘅寓所，洽談關於呢位巴西國腳轉會利物浦嘅可能性。最近一位由愛華頓轉會利物浦嘅球員，要數到 2002 年嘅葡萄牙後衛沙維亞。
愛華頓嘅管理層對該報道嘅內容作出否認，並且據了解，利物浦無意引入李察利臣。同埋呢位巴西國腳自從喺今季季前嘅夏天轉會窗，以 £40M 轉會費由屈福特加盟後，迅即成為愛華頓球迷嘅寵兒。
不過，連拿度維拉斯高的確有嚟到高普嘅寓所喎，究竟又所為何事呢？不如睇吓佢點講。
連拿度維拉斯高向一個英國媒體表示：「我同高普嘅會面同李察利臣無關。」
「我係德國球員 Noah Weißhaupt 嘅經理人，本身佢效力緊弗賴堡，同埋亦係德國 U20 國腳。佢嘅爸爸以前同高普一齊踢過波，佢哋係朋友嚟。因為佢嘅爸爸 Marcos 同高普之前並冇及時見面，所以今次帶埋佢嚟高普嘅屋企見吓面。」
「所以事情同李察利臣無關，啲人喜歡將一件事加落去另一件事情之上。」
李察利臣今季為愛華頓喺所有嘅賽事射入 13 球，係領隊馬高施華長遠計劃嘅重要部份。
