[修咸頓1-3利物浦]高普：球員上下為基達開齋鼓舞 | Liverpudlian Ty
利物浦喺先失一球嘅情況下，以 3-1 反勝修咸頓，重返聯賽榜首。領隊高普出席賽後記者招待會，主要內容如下：
1. 高普表示：「球隊表現好好。我哋知道修咸頓自從夏辛赫圖執教之後，真係已經係一隊唔同嘅球隊嚟。佢哋排出 541 陣式，同埋當時我哋嘅問題係，防線壓得唔夠上。」
2. 高普話：「修咸頓值得取得入球，但係之後我哋稍為作出調整，我哋攞返個波，取得控球，並且可以喺更理想嘅空間之下比賽。然後我哋扳平，場波重新開始，下半場修咸頓再次有唔錯嘅開局。」
3. 高普又話：「然後我哋換入兩位好積極嘅球員，軒達臣及占士米拿。佢哋幫咗我哋好多，無論喺更衣室，定係球場上都係一樣。及後我哋入咗兩個世界級嘅入球。」
4. 高普表示：「沙拿射入咗一個非常好嘅入球，非常好嘅跑動。費明奴可謂『滿場飛』，佢嘅走動非常積極，並且造就第三個入球。」
5. 講到沙拿，高普話：「沙拿係一個偉大嘅球員，從來都係毋庸置疑嘅。佢為利物浦射入咗第 50 個英超入球，令人難以置信。呢個係一個良好嘅時刻，相隔一段時間之後嘅第一個入球。」
6. 談及將軒達臣嘅位置推前，高普表示：「我哋曾經有傾過將軒達臣嘅位置推前，但係我哋有其他球員可以踢呢個位置。我哋今日做得非常好，軒達臣後上射入一球。」
7. 講到拿比基達入波，高普話：「成班球員喺更衣室，都為拿比基達取得入球，感到好高興，佢接受咗好多嘅擁抱。拿比基達喺早段有兩個比較困難嘅情況，但係之後佢已經入局，同埋取得入球當然對佢有幫助。」
