利物浦支付經理人費用稱冠英超 | Liverpudlian Ty
根據英格蘭足總喺星期四公佈嘅數字，利物浦上年花費喺球員經理人嘅金額接近 £44M，係英超最多。
喺 2018 年 2 月 1 日至 2019 年 1 月 31 日期間，利物浦花費喺呢類中介人身上嘅費用，多於其他英超球會，喺之前嗰 12 個月嘅情況都係一樣。
呢方面嘅花費同利物浦最接近嘅車路士，當中嘅差距已經接近 £17M，導致利物浦被首當其衝地批評，助長球會喺球員中介人身上，花費巨額資金嘅趨勢。
英超球會仍然渴望結束呢方面嘅財務支出，並且已經展開討論，當中包括引入規則，確保球員經理人費用只係由球員支付，而唔係球會同球員都要俾，以便促成轉會。
即使呢啲轉變唔係即時實施，但係利物浦嘅管理層亦都唔期望繼續喺中介人身上咁樣花費落去。
利物浦班主 FSG 喺上個夏天轉會市場上作出嘅舉動，以便令到球隊成為英超冠軍嘅競爭者。法賓奴 (£43M)、拿比基達 (£52M)、艾利臣 (£59M) 同埋沙基利 (£12M) 全部都加盟紅軍，每一個球員嘅轉會，都要俾佢哋嘅經理人一筆費用。
除咗轉會，仲有續約。利物浦同布魯斯達、軒達臣、羅拔臣、祖高美斯、阿歷山大阿諾、文尼同沙拿嘅續約，呢啲數字亦都包括咗喺英格蘭足總所公佈嘅數據之內。
現時都好難斷定，究竟咁樣嘅投資係咪物有所值，因為利物浦現時仍然競逐英超及歐聯冠軍。再加上喺 2 月份，公佈咗有 £125M 嘅盈利，可見球會並冇為咗要爭標，而超出其負擔能力。
不過，無論係點，利物浦領隊高普暗示，今次唔會再花大量嘅金錢喺轉會市場上，因為佢已經有一隊可以作出多線作戰嘅球隊。
高普喺 3 月份表示：「我唔想講實際上我哋會做啲乜，但係我唔認為呢隊球隊需要動用大量金錢之類嘅動作。」
「最好嘅方法就係帶領佢哋，嘗試令佢哋發展同成長，然後保持，同埋留低一段時間。」
「呢個可能就係利物浦喺過去十年所遇到嘅主要問題。當一個球季之後，擁有一隊好球隊，然後啲球員就各散東西，今年肯定唔會出現呢個情況。」
正因如此，利物浦將會希望下一年球員經理人費用嘅數字，可以反映到球隊正朝著正確嘅方向發展。
