奧歷治在利物浦的十字路口｜Liverpudlian Ty
呢個已經成為一個常見嘅現象。就係奧歷治後備入替，為利物浦帶來真正嘅改變。
奧歷治強壯、正面同埋直接，呢位比利時前鋒喺利物浦主場對熱刺場波後備入替，搏得一個角球，最終導致對方後衛艾達韋列特擺烏龍，令利物浦戲劇性地取勝。
利物浦領隊高普喺今季對奧歷治嘅信任有顯著增加。
上個夏天，由於奧歷治外借往德甲球會禾夫斯堡期間，表現只係一般，利物浦願意放走佢。期間，英超球會狼隊作出 £22M 加浮動條款洽購奧歷治，但係佢拒絕加盟。另外，德甲球會多蒙特因價錢問題與利物浦談不攏。
奧歷治最終繼續留隊，但係由球季開始，佢連後備都冇，呢種情況維持至 10 月 20 日。佢發現自己成為球隊嘅大後備，並且只係有份踢利物浦 U23 嘅賽事。
雖然係咁，但係值得讚賞嘅係，奧歷治並冇發脾氣，或者悶悶不樂。佢嘅態度簡直係無可挑剔，同埋漸漸地，但係肯定嘅係，佢喺訓練場上嘅努力，令佢可以同利物浦一齊向錦標勇闖。
喺 12 月，對愛華頓嘅默西塞特郡打吡戰，俾事業發展並唔如意嘅奧歷治一個機會，最後佢喺 96 分鐘，趁對方門將碧福特嘅失誤，為利物浦頂入致勝入球，成功奠定利物浦球迷崇拜嘅英雄地位。
當時奧歷治入替費明奴，令人感到絕望，始終之前喺上半季只係踢咗 11 分鐘。
但係高普對奧歷治嘅信任得到回報，佢喺足總盃輸俾狼隊場波，射入一球。及後喺聯賽以 5-0 大勝屈福特嘅賽事，都有一球進帳。
奧歷治今季喺所有賽事只有 4 次正選上陣，但係宜家再有 10 次後備入替。
奧歷治能勝任多個位置，成為高普有效嘅攻擊武器。高普可以搵佢踢中間，亦都可以放佢喺兩邊。
由於前鋒線嘅「三叉戟」，文尼、費明奴及沙拿已經係球隊嘅「鐵膽」，奧歷治就扮演咗重要嘅後備角色。
最近幾個星期，一直都話高普已經將奧歷治，放喺沙基利同史杜歷治之前。
點解呢？因為高普知道佢會得到啲咩效果。奧歷治喺有球在腳嘅情況下，會挑戰對方嘅防守球員；相反，佢喺無球在腳嘅時候，會不惜氣力地為球隊堵塞空間。
奧歷治完美地執行指令，喺作客對富咸，同埋主場對熱刺呢兩場波，佢後備入替，利物浦都能夠喺賽事末段取得致勝入球。
對於喺高普大軍之中嘅後備，甚至邊緣球員嚟講，奧歷治係一個完美嘅例子。佢展現出耐性，同埋當有機會來臨嘅時候，要好好把握。
自從喺 2014 年世界盃打響名堂之後，奧歷治已經唔係一名新秀。但係好容易令人忘記嘅係，佢今年都只係 23 歲。
無論嚟緊會發生咩事都好，利物浦同奧歷治喺今個夏天將要作出一個重大決定。
佢同利物浦嘅合約，將於 2020 年屆滿，究竟佢會否願意長期留效利物浦，成為費明奴嘅後備；定係打算轉會他投，成為其他球隊嘅主將呢？
如果冇再簽新約嘅話，咁到時利物浦必需決定趁佢嘅表現有起色嘅時候，將佢賣走套現，定係面對人財兩失嘅風險。
明顯地，以宜家嚟講，奧歷治對利物浦可謂至關重要，佢接連後備入替嘅表現有助利物浦爭取錦標。
