[修咸頓vs利物浦] 高普：雲迪克無大礙，可倒戈修咸頓 | Liverpudlian Ty
利物浦喺上一場聯賽，主場險勝熱刺 2-1。佢哋將會喺星期五，作客由夏辛赫圖帶領下，表現有改善嘅修咸頓。紅軍必須全取三分，以保持爭奪聯賽冠軍嘅機會。領隊高普出席賽前記者招待會，主要內容如下：
1. 高普表示：「雲迪克已經正常地操練，所有嘢睇嚟都冇咩問題。」
2. 講到修咸頓領隊夏辛赫圖，高普認為：「夏辛赫圖喺修咸頓所做緊嘅工作，係令人難以置信嘅。自從佢嚟到修咸頓之後，球隊嘅態況指數係排第 8 位。呢個分析真係有趣，佢哋唔似係一隊爭取護級嘅球隊。」
3. 談及曼城會對卡迪夫城，高普表示：「我可能會睇架。因為我哋喺幾個星期之後就要對卡迪夫城，而唔係因為曼城。」
4. 講到雲迪克，高普話：「我實在唔能夠用一個負面嘅字係關於佢嘅，佢係一個優秀球員。但係佢知道，你需要身邊嘅隊友，因為防守係要團隊合作。」
5. 講到雲迪克嘅防守令到熱刺中場莫沙施素高錯失入球機會，高普表示：「佢當時要防守兩個球員，要切斷對方傳俾其他球員嘅路線。如果你唔能夠作出主動，你就要令對方有機會出現錯誤。」
6. 高普話：「對熱刺場波嘅致勝入球係一個烏龍球，但係因為沙拿嘅頭鎚而引致嘅，個感覺上就好似係佢嘅入球咁。沙拿當時所身處嘅位置同埋處理方式，就好似喺訓練場上所做嘅咁樣，來自一個 second ball 嘅傳中球。當我睇返嘅時候， 我真係感到高興。」
7. 關於年青前鋒 Brewster 喺 U23 嘅復出，高普表示：「佢嘅臀部有瘀傷，我哋要作出觀察。好高興見到佢復出，佢今個星期生日，19 歲仔，嘩，真係瘋狂，仲有好多成長同發展嘅機會，大門正為佢而打開。」
8. 講到沙拿，高普話：「啲人話佢已經幾多場冇波入，但係佢睇嚟並唔感到困擾。足球係講求工作效率，你只要一次又一次咁去做，同埋會有一日，個波會嚟到你嘅方向。我哋宜家有 79 分，如果你喺一個球季，遇到重大嘅問題的話，係唔能夠得到架。」
9. 高普話：「當時我哋對於熱刺嘅陣式變化適應得唔夠快，但係呢種情況唔會再發生。星期五場波，將會係一場有趣嘅賽事 。」
