費基亞暗示今夏離隊 | Liverpudlian Ty
前利物浦羅致目標，法甲球會里昂中場球員費基亞，近日打破沉默，暗示嚟緊夏天可能會轉會他投。
有關費基亞嘅轉會嘅事情發展，要講到上個夏天嘅轉會窗，呢位法國國腳接近加盟利物浦。
當時費基亞已經著上利物浦嘅波衫影相，只差官方宣佈佢加盟嘅消息，但係因為過唔到體測，以致呢個轉會喺最後關頭，最終胎死腹中。
但係所有關於潛在轉會嘅擔心似乎可以放埋一邊，因為現年 25 歲嘅費基亞講到佢嘅將來，特別談及利物浦。
費基亞向法國媒體 Telefoot 表示：「利物浦？呢個就係人生，一個球員職業生涯嘅一部份。但係呢件事令你變得更強，同埋你必須要前進。」
「我真係唔知喺嚟緊嘅夏天將會做啲乜。但係正如我之前所講，我喺里昂感覺良好。球會主席相信我，呢個係好事嚟，(會否同球會續約) 睇吓日後事情嘅發展啦。」
同時間，有利物浦球迷相信，佢哋已經搵到費基亞將會喺嚟緊夏天加盟利物浦嘅證據。
佢哋發現到一件有趣嘅事，係關於費基亞嘅經理人同埋利物浦體育總監米高愛華士。原來米高愛華士會參加一項慈善活動，費基亞嘅經理人 Jean-Pierre Bernes 捐咗£1,000 俾佢。
