雲克斯給謝拉特的一封信…… | Liverpudlian Ty
今晚利物浦喺主場迎戰熱刺，會係一場硬仗。雖然係咁，不如睇吓一啲比較輕鬆少少嘅嘢啦。
今晚因傷無緣上陣嘅熱刺中場雲克斯透露，佢自細就立志成為職業足球員，喺 7 歲嘅時候，寫過一封信俾謝拉特，希望佢可以俾啲意見，但係冇收到回信。
雖然自細就係熱刺球迷，但係呢位現年 23 歲嘅英格蘭國腳中場承認，謝拉特係佢小時候嘅英雄人物。
不過，無論係點都好，已經成為職業足球員嘅雲克斯講笑咁話，雖然收唔到謝拉特嘅回覆，但係都唔會難過嘅。
雲克斯告知 Skysports：「謝拉特以往經常都係我好欣賞同仰慕嘅人。我喺好多年前真係寫咗一封信俾佢架，但係一直都冇得到回覆！」
「咁我當時都冇諗過佢會回覆，我諗係當我大約 6 至 7 歲左右，我將封信寄去利物浦嘅訓練場！」
「封信嘅內容係咁樣嘅 – 我真係想成為一名職業足球員，我真係想好似你咁呀！你可唔可以俾啲意見我，同埋對於你認為我需要做嘅事情上，可以幫吓我呀？！」
「當時我甚至係唔知道自己係咪將封信寄去正確嘅地址，可能郵局或者喺沿途上寄失咗啦。」
「我有冇話佢知？冇呀！我從來都冇見過佢。」
