紅軍小將捷利維拿欲返西班牙搵食 | Liverpudlian Ty
根據 Ian Doyle，利物浦嘅西班牙中場球員捷利維拿（Pedro Chirivella）對被投閒置散嘅情況感到失望，佢承認想喺來季返回西班牙。
捷利維拿本來係外借往西乙球會埃克達馬杜拉（Extremadura）至今季結束，但因為呢單 deal 未能及時喺一月限期前被批准，所以佢唔能夠上陣。
現年 21 歲嘅捷利維拿，對上一次為利物浦上陣，已經係 2016 年 5 月嘅事，佢宜家喺埃克達馬杜拉參與操練。
佢話：「呢個並唔係我想要嘅情況，但係每一日我感覺到自己變得更強，期待下季嘅來臨。」
「呢個時候我仍然喺埃克達馬杜拉，正等待緊利物浦嘅回應。」
「呢個轉會比限期遲咗 40 分鐘，我唔知道邊方面嘅溝通出現咗問題，但係受影響嗰個係我。」
捷利維拿同利物浦嘅合約喺今季結束後屆滿，佢喺上年 8 月，拒絕以 £3.5M 嘅轉會費，轉投挪超球會洛辛堡。
佢喺 2016-17 年度球季嘅下半季，外借往當時嘅荷甲球會 Go Ahead Eagles，之後嗰一個球季就外借去另一間荷甲球會威廉二世。
捷利維拿向西班牙媒體《阿斯報》表示，對於自己喺利物浦嘅前途問題，要面對現實。
佢話：「我睇到高普喜歡我，但係你亦都要面對現實。利物浦係世上最佳球會之一，但係我想外借，以便得到出賽機會。」
「我唔後悔嚟到利物浦，因為喺利物浦，令到成為球場上嘅男子漢。」
「但係利物浦知道，我想返回西班牙。」
