大家仲記唔記得佢呢？阿基蘭尼，佢來自羅馬，以往有「小王子」之稱，喺 2009 年，由羅馬轉投利物浦。
阿基蘭尼現時係位於羅馬嘅 Spes Montesacro 足球學校嘅主席，呢間學校令佢開始接觸足球。佢接受意大利媒體 gianlucadimarcio.com 嘅獨家訪問，當中談及佢由意大利去到利物浦，兼且講到傷患對佢嘅球員生涯有咩影響。但係，一切由羅馬開始 ……
「我以前要為加盟羅馬定係拉素作出選擇。譚比斯迪利 (前羅馬球員) 同我爸爸講，去羅馬嘅 Trigoria 簽約，我嘅內心已為我作出決定。」當時仲係好年青嘅阿基蘭尼，曾經拒絕兩間英超球會嘅邀請，分別係車路士，同埋由雲加執教嘅阿仙奴。
阿基蘭尼及後講到由意甲登陸英超嘅一次轉會。佢話：「呢個係困難嘅，我要去到英格蘭，一個寒冷嘅地方，面對一個大嘅轉變，但係我可以同一班不可思議嘅球員成為隊友。費蘭度托利斯、馬斯查蘭奴、古治同埋謝拉特。謝拉特係我歷來共事過嘅其中一位最佳球員。過去每一年，我都收到重要嘅邀請，拒絕咗來自國際米蘭、祖雲達斯嘅邀請，我同羅馬將呢啲邀請全部都拒絕晒。喺嗰年 (2009 年)，我受咗傷，羅馬亦都有財政困難，並且需要賣走球員套現。胡仙歷同我都收到幾個邀請，所以就轉會喇。」
喺 2014 年，阿基蘭尼射入 7 個入球，入選意大利世界盃 23 人大軍名單，但係並冇機會上陣。佢話：「能夠置身於大軍之中，我感到好光榮同埋驕傲，可以參與世界盃，係一個夢想。對於當時未有機會上陣，我仍然感到遺憾。喺 2013 年，我哋喺洲際國家盃取得季軍，當時有一班好好嘅球員。」
被問到傷患有否對佢嘅球員生涯構成影響，阿基蘭尼表示：「傷患往往喺最差嘅時候嚟到我身上，似乎經常都係咁樣發生。喺 AC 米蘭嘅時候，我表現唔錯，亦有良好狀態，但係後來我傷咗 3 個月，自此以後都未能回復過來。我曾經諗過，本應能夠做得更多，但係都唔緊要啦。」
