布魯斯達復出狀態大勇 | Liverpudlian Ty
因為受傷，抖咗 15 個月嘅年青前鋒 Rhian Brewster，喺星期五為利物浦 U23 踢一場於 Kirkby 舉行嘅閉門友賽，佢射入咗兩球。
Brewster 自從喺 2018 年 1 月，因為膝蓋同足踝嚴重受傷，以致一直未能上陣。喺星期五嘅閉門友賽，利物浦 U23 領隊 Neill Critchley 俾佢踢 45 分鐘。佢喺賽事中展示其射門觸覺同埋能力，射入兩球，協助利物浦 U23 以 4-0 擊敗 Northwestern University。
除咗 Brewster，蘇格蘭後衛東尼加拉查亦都入咗兩球波，但係仍以 Brewster 嘅表現最為耀眼。
Brewster 嘅第一個入球，係喺禁區邊彎入破網。第二球係佢喺隊友 Glen McAuley 嘅射門中楣之後，展現射手本色，補射入網，梅開二度。
同樣康服之中嘅利物浦中場球員張伯倫亦有到場觀戰，佢同 Brewster 一齊喺 Melwood 完成咗艱巨嘅康復療程，所以大家嘅關係亦都越來越好。張伯倫雖然喺 3 個星期前，對打吡郡 U23 場波，出現咗少少嘅肌肉問題，但係預期會喺下個星期全面復操。
Brewster 喺呢個月較早前向媒體談及，當時喺對曼城 U23 場波受傷之後，所遇到嘅困難。
佢話：「你會發現咗好多關於自己嘅事情，喺精神上你要好堅強。」
「當時做嘅係一個大手術，所以我知道係需要付出好大嘅努力。呢個係困難架，你知道嗎？你要喺健身房做幾個鐘頭嘅強化練習，而呢樣嘢只係令你能夠再次開始跑步咋，你甚至唔能夠去諗幾時開始重返球場。」
Brewster 喺上年個夏天，同利物浦簽下一份為期 5 年嘅職業球員合約，仍然被領隊高普及教練團成員致以高度評價，相信佢哋對於呢位年青球員喺康復路上嘅正面發展感到高興。同張伯倫一樣，Brewster 嘅復出安排亦會小心地處理，利物浦亦都唔想俾球員有太大壓力。
利物浦 U23 嘅下一場賽事將於 4 月 6 日進行，佢哋會喺 Kirkby 迎戰車路士。假設 Brewster 喺今次嘅閉門友賽之後，冇不良反應嘅話，到時佢就會有機會對返前球會。
