意甲在中國踢？又睇定啲先 | 李聲揚
剛好早排有體嘢版友問開，意大利加入一帶一路，會對意大利足球有乜影響。應該好快有消息出。
好簡單，個計劃就係，安排意甲在中國踢。有埋初稿，應該冇乜走雞，預計呢一兩日會公佈。預計至少會玩三季，亦都會安排兩國國家隊去對方地頭踢友賽。（編按：意大利足協主席已否認在中國舉辦意甲海外賽，最有可能在中國舉行的官方賽事是意大利超級盃或意大利盃。）
習近平呢刻在意大利，如無意外意大利會加入「一帶一路」（已簽諒解備忘錄）。隨團有成500人，中央廣電總台（CCTV母公司）亦有代表，所以就有呢個中意足球加強合作嘅安排。
不過意甲在中國踢，都仲有可能遇到問題。講到尾都係分贓唔勻。友賽任你點玩，亦管唔到，但到常規賽就唔係咁講。NBA好早已經在外國打常規賽（中國就好似只係打過季前賽），但自己一言堂當然易搞。歐洲四／五大聯賽都冇試過在中國踢常規賽（其他地方都好似冇？）。原因當然係亞洲足協（AFC），國際足協（FIFA）都有機會反對。
舊年西甲原本想今年年初在美國踢一場（巴塞對基羅納），一樣泡湯，亦係因為國際足協阻止，而且本土球迷球員都反對。英超2008年已經諗呢樣嘢，亦係球迷傳媒政客都鬧。當然意甲就你懂的，「球會傳媒政客咪又係同一班友」，所以最後應該阻力會係亞洲足協，歐洲足協同國際足協。
除咗意甲在中國踢，以及雙方國家隊友賽呢啲相對門面嘅嘢，仲有就係意大利會幫中資公司搭路投資意甲球會。點幫唔知，但意甲球會再染紅應該指日可待。當然亦會製作多啲多媒體內容（意甲精華？）畀中央台云云。
最後講少少政治，意大利加入「一帶一路」當然係習近平一個勝利，至少有面子。意大利係第一個G7（七大工業國）成員國加入一帶一路（相信亦係最後一個…..掛？）。仲要係歐盟早排先講要對中國強硬啲，慎防畀人統戰，逐個擊破打開缺口（之前已有希臘因為莫財投向中國，港口都租埋畀人），意大利嘅舉動無疑係星咗歐盟一巴。
個人意見係意大利佬嘅嘢……有名你叫，「歐洲中國」，邊個笑到最後都仲未知。
