今日轉下口味，寫波，譯文。哥迪奧拿嘅曼城。近期少睇曼城，甚至少睇波。寫錯譯錯勿插。不過其實我都只係翻譯篇好文。
大炒車路士半打後，呢一刻曼城以得失球反壓利物浦，上返榜首。哥迪奧拿早排先講過今屆英超冠軍可能要睇得失球。言猶在耳，估唔到佢地對車路士都刷到6個得失球差。
冇錯，利物浦依然踼少場，係英超失分最少嘅球會。但曼城得失球去到驚人嘅+54（利物浦係+44），靠嘅應該係進攻火力（入74球，多利物浦15球），多過防守（失20球，多利物浦5球）．本文係Michael Cox （作者）寫於對車路士前，分析一個好似好廢嘅問題：點解曼城入咁多波。
Man City scoring so many ‘open goals’ is no coincidence
Feb 5, 2019 Michael CoxESPN.com writer Sergio Aguero’s hat trick against Arsenal was the 10th of his Premier League career — just one behind the record of 11 held by Alan Shearer. It was possibly the simplest treble of his career, scored from a combined distance of just 12 yards and composed of a header that was difficult to miss and two open goals.
答案好簡單：就係因為曼城創造啲冇難度嘅入球，近一近門先射，成日有空門。聽落好廢，但就係勁在可以造到呢啲攻勢嘅過程。埋門嗰腳其實唔難，但其他隊造唔到呢啲easy chance畀射手。
作者先係回帶講返阿古路月初對阿仙奴嘅帽子戲法，好可能係佢職業生涯最簡單嘅一次。三球夾埋先離門十二碼，一個簡單頭槌，兩球空門。作者認為呢個帽子戲法，好能夠代表哥迪奧拿在曼城嘅足球哲學。
曼城並唔係英超射門最多嘅球隊，但入波最多。你以為係因為射手質素？可能，但更大可能係因為佢地只會好近門先起腳。哥迪奧拿最強調嘅係將個波運到去（統計上）入波機會大嘅區域，亦所以見到佢地成日都射空門。（譯者，即係本人，補充：哥迪奧拿在不同球會，踢法唔係完全一樣，但本人認為極少遠射同「鳩斬」係最大共通點。冇數據支持，但記得在拜仁年代都係成日有呢啲射空門嘅情況）
阿古路對阿仙奴嘅第二第三入球，都係射空門。係曼城今季第六同第七次（未計對愛華頓同車路士）。阿古路個人佔咗三個，但其他係辛尼，史達寧同埋馬列斯入。
作者講返，阿古路勁就人人都知，冇人質疑。但史達寧呢啲明明之前係屌靶，畀人覺得佢把握力差，敗家仔。因乜去到曼城好似重生？唔係因為佢埋門好咗，係因為佢成日企到靚位，你去起腳都入。
有好多方法可以睇到曼城嘅「近距離埋門」。例如佢地在小禁區起腳次數全英超最多（36），佢地嘅埋門距離全英超第二（第一係……般尼，奇怪），而佢地嘅xG（expected Goal，懶解，自己Google）亦當然係全英超最高。
但最重要睇到嘅一樣係：佢地入嘅空門入球，多數都係自己創造出嚟嘅。唔係對方犯錯，唔係波子機反彈。咁到底點樣造到咁多空門出嚟？四大點。
第一．拉開對方防守嘅深度同闊度。哥迪奧拿在曼城都係打4–3–3，同佢在巴塞拜仁大同小異。不過在巴塞佢有美斯，打個假九號。拜仁佢就玩inverted winger（本人補充：洛賓左腳踢右邊呢味嘢在哥迪奧拿嚟之前已經係咁玩），去到曼城就用返natural sides。會見到經常曼城有三個球員同時插入對方防線。除咗中間嘅阿古路外，好多時會係迪布尼，大衞施華同貝拿度施華三個其中兩個。同時間，前場6個球員5個都係進攻意識極強嘅，所以單拖做防守嘅費度甸奴作用極為重要。
例子：9月史達寧對布萊頓先開紀錄一球，阿古路接應傳送，牽制住對方防線，同時間左邊嘅辛尼同右邊嘅史達寧同時插入去。阿古路忽然傳去左邊畀辛尼，再傳返去遠柱無人看管嘅史達寧——射空門。
第二．好有耐性咁，造直線波畀翼鋒，跑住上腳。大家都知哥迪奧拿唔鍾意玩長傳，即使後場上去都唔鍾意大斜線傳波。一般都會造到翼鋒（多數係辛尼同史達寧）可以全速跑動咁接應波先餵畀佢地。
例子：11月對修咸頓時，2–0阿古路入嗰球。拿，呢段片我搵咗好耐。一般精華只係得助攻埋門嗰腳。重點唔係埋門甚至史達寧助攻，而係在右邊貝拿度施華點樣見到史達寧有空位起跑先放畀佢嗰下。然後又係三個攻擊球員一齊插入去。
第三．窄位傳地波去中間。呢個係曼城招牌菜（本人補充：你見拜仁，特別係列貝利在左路，都做好多呢啲）。哥迪奧拿嘅傳中唔係傳統由禁區外斬入中間頂頭槌，亦都唔係靠叠瓦式助攻。而係在窄位，出個急勁地波出嚟，穿過小禁區，基本上係解決埋個龍門。當然，個波出得急勁，埋門者又飛埋去，有時啲射門質素好難保證。但反正龍門都過埋，多數亂咁撞都入。
例子：9月對富咸，阿古路助攻史達寧嘅一球波（3–0嗰球）。阿古路落到貼近底線出個急勁停波，龍門當然只能夠睇住。其實連埋門嘅史達寧都唔知點射，左腳定右腳，唔理啦本能反應求其撞埋去先算。就入咗。
VIDEO Manchester City 3 – 0 Fulham
15th September, 2018 – Premier League, goals: Leroy Sane, David Silva, Raheem Sterling
第四．走去中堅嘅盲眼位。聽落好似阿媽係女人，但又係哥迪奧拿在曼城成日有得射空門嘅原因。往往埋門嗰個係在中堅嘅一對中身後。當然如果係翼鋒例如辛尼同史達寧埋門，就好自然。但得意在阿古路都會做呢樣嘢，因為知道中堅一係望波一望冇佢，但不能兩樣同時做到。
例子：又係剛剛對阿仙奴，阿古路帽子戲法嘅第二球。走咗去遠柱，高拿仙納嘅盲眼位。
作者同時批評（恥笑？）講波佬認為射近柱係賭博。佢認為，好似曼城咁玩傳去遠柱後面冚上先係賭博。中間可能會畀人截到，但搞得掂嘅，多數遠柱就係你埋門都入嘅必入波。近柱？仲要過埋守門員果關。
最後一段最堪玩味：哥迪奧拿嘅曼城，玩控球玩到出神入化，往往係龍門都搞掂埋，任你乜龍都死。好多人都知哥迪奧拿要求龍門要「識用波」，係outfield player嘅一部份，要參加埋策動攻勢，所以佢鍾意紐亞，至憎啲一腳清唔識用腳嘅龍門。但比較少人講係：曼城而家當到對面個守門員都係outfield player！你係要過埋佢，用波繞過佢，而唔係射佢等佢有機會撲。
