重量級專訪：賓尼迪斯 「我無悔無憾——我只係表達球迷心聲」| 譯：阿祖安奴

編按：賓尼迪斯（Rafa Benitez）是帶領利物浦重返歐洲之巔的男人，至今仍與紅軍密不可分。對於他當年在伊斯坦堡之夜的逆轉奇蹟、放走沙比阿朗素，以及在晏菲路的高低起伏，仍使許多利迷充滿好奇。他在接受《FourFourTwo》訪問時，談及這一切的由來。

原文：FourFourTwo

點解你可以第一季教利物浦就贏到歐聯？你覺得成功嘅元素係咩？我哋聽唔同球員講過佢哋版本，我哋想問你半場喺更衣室度同球員講咗啲咩？你相信下半場可以翻盤嗎？（David Harrison, via Twitter）

球隊上下好團結，尤其喺歐聯賽場上——我哋認為可以打贏任何對手，因為我哋能夠適應唔同戰術，同埋能夠以唔同面貌作戰。精神層面亦都好好，你再睇多次決賽就會發現我講嘅精神係指咩。

半場時我哋調動重要過我哋講嘅嘢。戰術上，我哋轉咗踢三後衛同埋換夏文出場，填塞卡卡中場中路嘅空間。我同球員講過如果我哋入返一球，成個局面會返嚟，結果預言成真。當然喺下半場開始見到球隊出場，我哋先開始相信追得返。

如果俾你去返 08/09 利物浦喺英超屈居亞軍嘅球季，你會唔會有啲嘢可以做得更好——例如一月羅比堅尼離隊時可以收購返另一個前鋒？（Alex King, Newcastle）

我哋只能限米煮限飯。其實都好難諗有啲咩可以做得更好，因為我哋全季只係輸咗兩場波。之前嗰季聯賽冠軍只係得80分，我哋 08/09 球季有86分。

點解你會留羊咩鬚？有啲人講你有中年危機……（Ian Pamment, via Twitter）

我有次放假無剃到鬚，放完假咪決定繼續留。

巴利揀咗曼城唔去利物浦時你咩感受？你認唔認為想收購佢係沙比阿朗素離隊原因？（Alec Davids, via email）

做領隊你一定要諗大picture，喺巴利呢個case上面，佢除咗係英人之外，亦可以打幾個位置。當英超開始限制外援限額時，你就要提前準備好。當然事情變得複雜——但我仍然覺得值得嘗試收購，因為當年（編按：07/08球季）沙比的比賽狀態有所回落。

你同利物浦兩位老闆Gillett和Hicks關係如何？當年新老闆上場，你滿意佢哋？（Axel van Dijk, The Hague）

當你同你老細要「Long D」，而且缺乏流暢溝通嘅時候，情況從來都唔容易，但你都需要接受。我覺得大家都知道發生咩事（編按：球會出現財困），情況如何艱難嘅時候我哋仍然盡力工作；尤其係最後一年我哋完全無董事局支援。而家球會情況當然截然不同，大家團結一致務求做到最好。你睇唔到有人將自己放喺球會前面。

回望你執教利記生涯，要你比較，你覺得你贏歐聯同足總盃嗰種滿足，蓋唔蓋過到贏唔到英超嘅失落？（Daniel Coakley, via Twitter）

做人往往需要正面啲，其實我哋都達成咗好多事。利記以前都需要為頭四爭扎，但我執教時候近乎每年都能打入歐聯。好多時大眾忽略咗年年前四其實無想像中咁易。球迷亦期望利物浦能夠奪得英超，呢樣亦係我哋重要目標，不過我哋每年都要同阿仙奴、車路士同曼聯競爭——當年呢三隊波都係歐洲最佳球隊之一。我哋盡晒力。

其實你同費sir關係係點？仲有摩佬？你有無對自己當年喺記者會講嘅「The facts」（對費格遜玩「心理戰」之指控）感到後悔？（Daniel Jones, Stoke）

喺未同佢兩個有正面競爭前，我哋關係其實幾好。當我哋開始贏到曼聯幾次，開始追近佢哋之後，成個風向就開始轉變。我無悔無憾——我只係表達球迷心聲，我覺得當時爭標階段，時機亦合適所以咁做。有人睇法唔同，分別在於當時我哋踢少兩場，但曼聯分數較多，所以有相反意見。我覺得其實唔係咁。

你教利物浦時成日俾人話你唔俾機會後生仔。但對於你邀請King Kenny重返球會重整青訓呢件事又唔提。你有咩感受？（Will Day, via email）

一開始時候我哋試過投入資源喺青訓，但未能成功——我哋睇到當時球會唔能夠出產足夠好嘅青訓球員。到最後我哋真係可以有機會全權負責青訓學院之後，就可能將新嘅想法放落去。你而家睇到球會青訓成果啦。

體嘢編輯部

資訊浩瀚；東張西望。
竭盡所能；深入求真。
企高一格；全新體法。