打機打壞腦嘅年代 | 蔣美葉
十幾年前，同朋友睇波時，都已經會「以 Game 論波」，例如當阿祖安奴行埋去射罰球時，大家都會話「Shot Power 98！」，又或者當亨利大步推時，大家又會話「全部 20 架！」，而大家都會知道講緊嘅係加速 20、速度 20，因為有種語言叫打機。
數年前，曾經喺體嘢寫文講述日職登錄 FIFA 時，就指打機係一個去認識更多球員嘅良好平台。除咗 Pro Club 模式外，不論單機或 FUT，你都總曾經因為為咗砌靚個陣，但 Budget 有限而用到一啲你平日睇波根本唔會揀嚟睇嘅球員，而十分微妙嘅係，當你有日係電視機上第一次睇呢位可能已經為你上陣過百場、立下唔少汗馬功勞嘅球員比賽時，會感到陌生得嚟又有份講不出口嘅親切感。
不過當你發現，遊戲世界嘅球王，現實中連波都控唔好時 (絕非影射盧卡古！)，當踏入轉會窗便覺得係時候賣咗呢位「名不副實」嘅球王，好套現大筆轉會資金，隨即羅致現實同遊戲相符嘅球星，又或再去尋找下一個 Wonderkid 或「重生」嘅球星，薪火相傳下去。
其實而我講緊嘅係阿里斯文迪 Arizmendi。
除咗認識更多球員外，打機為你嘅「足球資料庫」最大貢獻莫過於係一路打機，你會牢記咗好多球員嘅英文名字，多多少少都會因為咁而自覺英文水平提昇咗。我就曾經喺一次校內英文作文考試中，題為記述一次學校旅行，而將整支英格蘭國家隊球員名寫下去 (大約係 with 一個又一個球員名)，務求將 120 字字數要求濫竽充數 (中一定中二咋，但求各英國文學博士網開一面)。結果成績係… 我已經唔記得咗。
打機，係男人嘅命根；足球，係男人嘅浪漫。將兩者結合，可能係男人最好嘅聖誕禮物。所以，身為人地女朋友嘅你，其實唔使諗買咩牌子嘅領帶、鈕扣等，只要你唔阻住你嘅另一半放假打機睇波，已經係最好嘅聖誕禮物，若然能夠加多張點數卡，絕對係呢份最佳聖誕禮物來一個錦上添花！
