一衫一意：2000/02 布雷西亞主場 ｜意甲大本營
講到最具特色意大利球會波衫設計，大本營今次跳出意甲，講下意乙布雷西亞。雖然布雷西亞屬於省級小球會，但係曾幾何時佢地有巴治奧在陣傲然立足意甲，名帥馬桑尼的自由風格廣受意甲球迷好評。大本營今次介紹既布雷西亞波衫，理所當然係巴治奧加持過既2000/2002版本啦。
先講下布雷西亞波衫既傳統設計，常見獅子同大V字呢兩個Features都同佢地坎坷歷史有關。1848/49年布雷西亞所在倫巴底大區爆發革命反抗奧地利哈布斯堡皇室暴政，起義失敗被奧地利大軍圍攻，布雷西亞呢個小城不屈抵抗到底，交戰10天超過千人犧牲性命，被後世冠以Leonessa d’Italia (意大利之獅)英名。日後倫巴底大區終於擺脫奧地利統治成為意大利王國一部分，因著紀念布雷西亞城既勇武，V字勝利符號從1927年開始逐漸成為布雷西亞球隊波衫常用設計 (千祈唔好以為佢地抄精工呀!)。
2000/2002年波衫係本土品牌Garman手筆，主場藍底白色大V字一改以前大到由兩袖上臂落到褲帶既設計，收細一些變成兩膊到肚臍位，膊頭望落份外橫，咁man既設計連鋼條型少年派路都carry得到，魁梧大漢如盧卡東尼著左V字簡直成座山咁既樣，戰鬥格攞滿分。至於獅子就被放在左邊衫袖，不過當時會徽既獅子設計有D尷尬，因為隻獅子身形肥胖又無利爪，被譏笑為一頭鈍獅，所以時至今日布雷西亞會徽得番個獅吼頭 🙂
當然無論波衫設計幾型都好，最緊要有好波之人著佢上身省靚招牌。千禧年代布雷西亞亮點唔淨止巴治奧派路東尼幾位，仲有煙鏟老頭射手Dario Huebner，隊史頭號射手Andrea Caracciolo，現任拉素坐館Igli Tare，英年早逝捷克神經刀門將史歷錫，更加唔少得大名鼎鼎「哥帥」哥迪奧拿，陣容星味十足。Fast forward返2018年，布雷西亞又再出產耀眼本土新星Sandro Tonali，唔知獅子同大V字標志會唔會好快在意甲同大家見面？
#DJ
