港隊賽後筆記：香港0-1泰國 | KH筆記
經歷過選帥風波，戴偉浚嘅爭議後，港隊迎來加利韋特執教嘅首場國際賽。不過喺開賽兩分鐘就已經被泰國攻破防線，最終亦因為呢個失球而以 0–1 不敵對手。雖然如此，港隊今場比賽嘅表現並唔算差，球迷們亦應該開始睇到加利韋特執教下嘅球隊風格。
從今場比賽所見，港隊嘅防線比起金判坤時代冇縮得咁後，取得控球權之後傳送到前場嘅時間亦較短；同時踢法亦較為簡單，相對於過往嘗試由兩翼突破製造進攻空間，加利韋特手下嘅港隊更多時候會選擇長傳，由中鋒擔任進攻支點，再分去兩邊傳中。
港隊嘅死球攻勢應該係今日最有威脅嘅進攻套路，不過法圖斯、艾力士都未能把握機會。下半場雖然控制局勢，更有一段壓住泰國嚟攻，但係麥基、徐德帥、基奧雲尼、曾錦濤等多次攻門都係無功而還。如果埋門質素可以改善，港隊今場應該唔使飲恨。
之後講講幾位球員嘅表現：
基奧北上中甲之後，真係脫胎換骨，今場作為正選中鋒，喺前線停球、二傳、博取犯規都帶到威脅，下半場更加造就麥基喺右路嘅一次單刀機會。面對制空能力較弱嘅對手，基奧無疑係中鋒嘅首選。
啱啱入籍嘅基奧雲尼可以話係港隊最需要嘅前鋒：後備入替30分鐘，喺港隊前場帶到極大嘅作用，尤其係佢個人突破同遠射嘅能力，係港隊進攻陷入僵局嘅時候，非常需要嘅武器；除此之外，佢同辛祖作為雙箭頭嘅配合亦頗為理想。現年36歲嘅佢，要場場踢足90分鐘或者係強人所難，反而後備入替作為Plan B，可能係佢最好嘅位置。
相比起喺東方龍獅嘅重生，鄭璟昊呢場嘅比賽嘅表現確實令人失望。港隊今場兩閘失位被入楔嘅場面都幾常見，特別係鄭璟昊鎮守嘅右路，位置感一般之餘，經常標波亦對防線造成負擔；更大鑊係佢今場有幾次後場傳送嘅失誤，都幾乎為對方送禮。或者呢個世界上，只得牛丸先用得好鄭璟昊。
今日正選陣容最唔同意嘅決定，係黃威踢中場中。今場伙拍黃洋踢雙中場，防守上作用有限之餘，黃威同時需要返到後場拎波，盤扭、放直線等最有威脅嘅發揮亦見唔到；下半場見到佢幾次返到中堅嘅位置控球，都摸不著頭腦。如果可以嘅話，比黃威踢上一格，即係踢艾力士嘅位置，由陳俊樂或者梁振邦踢中場中，效果相信更好。
相信4–4–2都會係未來港隊嘅主要陣式，隨住加利韋特開始熟悉球員，並且同佢哋磨合，港隊嘅發揮應該會再有進步。當然如果可以選擇更有突破同傳送能力嘅翼鋒，進攻上會對港隊更有幫助。希望喺東亞足球錦標賽外圍賽，大家會見到港隊有更好嘅表現。
