自古以來，紫色都是尊貴罕有的顏色，不過，費倫天拿用上紫色作主場顏色亦只是一個偶然。費倫天拿一開始使用的主場顏色是白色和紅色，這兩隻顏色是佛羅倫斯市徽的顏色。不過由於當時的技術有限，紅白色的波衫經過多次洗滌後就慢慢變成了紫色，於是到了1928年就索性用上紫色作為主場顏色，而同時費倫天拿亦都獲得了「Viola」的暱稱。
如此獨特的顏色令到費倫天拿的主場波衫本身就非常漂亮、突出，而同時紫百合亦都出產過不少經典款式，其中當然要數到1998/99的主場波衫。
Fila、任天堂以及坐擁巴迪高的費倫天拿，又有咩組合比呢個更加經典？Fila和任天堂兩組商標的文字風格亦都可以講係非常相似，再加上主調都是白色，配上兩袖上的白色圓角矩形，所以整體看起來十分順眼。從現今的角度嚟睇，呢件波衫的確係充滿住90年代的味道，亦難怪時至今日依然備受球迷追捧。
而呢件波衫之所以經典，都係因為着嘅人厲害。當季的隊長巴迪斯圖達總共上陣37場，入咗26球，其中意甲就佔咗21球。儘管去到最後巴迪高以一球之差排係當屆神射手烏甸尼斯的阿武羅素之後，但戰神身穿呢件波衫入波嘅「機關槍掃射」慶祝英姿依然廣為世人傳頌。
當然該季的費倫天拿除咗巴迪斯圖達亦都有多位勁人在陣，經典人物有葡萄牙人雷．哥斯達以及守門員托度，而教頭查帕東尼亦都係家傳戶曉的人物。可惜嘅係呢隊紫百合屬於「前面入幾多，後面失幾多」嘅類型，最終係意甲只能得第三，無緣任何錦標。
