車路士對利物浦，無容置疑，係今季暫時最好睇嘅一場比賽。作為利迷，即使利物浦只能憑史杜列治喺尾段嘅「神來之筆」才能夠扳平，不致於三分全失。就結果而論，當然稱唔上稱心滿意；但就比賽過程而言，卻是近年難得一見賽內賽外都充滿著鬥智鬥力嘅比拼。
兩閘對兩翼
賽前 Game Plan，不意外，其實屬理所當然的，沙利安排兩閘專人招咪紅軍三叉戥嘅兩翼。所以比賽過程，甚至賽後，不同的討論區都不難發現利迷批評文尼「隱影」；但試問沙拿所面對嘅係「攻強守弱」（相對地）嘅艾朗素，相反文尼面對嘅係「守強攻弱」（相對地）嘅艾斯派利古達，一面倒批評文尼「無影」，是否公平？
的確，我承認，作為文尼 Fans 嘅我，對文尼嘅缺態是較為「包容」。
文尼對沙拿，WTF？
但奇怪嘅係，各地利迷都好鍾意將文尼同沙拿放係一個充滿個人主見嘅天秤上去衡量兩者嘅表現。若你係沙拿 Fans，睇到呢度可能已經心中無名火起，為沙拿受不公評價而抓狂。
不不不，請冷靜。撫心自問，昨夜沙拿表現確係較文尼優勝，甚至一直與友人說，該換走嘅係文尼，而非沙拿。即使沙拿初段以兩記肉酸嘅射門為今仗嘅表現沾上污點也好，亦不得不讚兩次射門都是源自佢出色嘅盤控帶；相比文尼整場比賽就只有一腳十分近磅（卻被藍軍門將「神救」輔出底線），沙拿三個大 Chance（一記射太正中間、一記射上看台、一記被魯迪加護空門）足以令沙拿今仗評分置於文尼之上。
最後一點，其實作為利迷，請放下平日睇延禧嘅心態，並不是每個人都鍾意勾心鬥角，球場事每每電光火石，豈有時間去「勾」？
軒達臣、費明奴嘅價值
不意外，自軒達臣加盟，他已成為部份利迷每當輸波時嘅攻擊對象。當軒達臣接過隊長臂章後，情況更為嚴重。就曾經有資深利迷以薩卡來嘲諷軒達臣嘅不濟，足見情況有多惡劣。
可能你會話，「軒達臣只會後場橫傳，呢啲街場都大把」。但試問，街場嘅壓迫有今場車路士咁強嗎？連港超都甚少睇到全場 90 分鐘「高壓迫搶」，何況街場。昨夜嘅軒達臣，其作用係唔明顯，但唔代表佢無所作為、無建樹。個人覺得值得一讚嘅係，兵荒馬亂之際，軒在防守時截球後嘅決定都係正確不過，要電光火石之間作出決定以大腳解圍或是短傳予處於安全位置嘅隊友，如果你覺得其實唔難，我只能嘆一句：Ok, you win!
至於費明奴，作用更加唔明顯，但作用更為重要，因為佢係今仗負責凍結佐真奴嘅「專人」。佐真奴表現固然出色，與高華錫幾個 Passing 已能夠將紅軍防線三番四次「劏開」；但個人認為，要不是費明奴盡了最大能力去追截、給予壓力，佐真奴今仗發揮會更出色，高華錫亦會多咗空間去做「插前」嘅工作。
順口開河，草草砸下一句軒達臣、費明奴今仗不濟嘅人，無疑係一輩子都未試過帶一個足球出走廊（遑論落街場）同街坊踢波嘅自大狂。
雲迪克嘅重要性
雲迪克嘅重要性，相信不必費唇多說，但昨夜可有留意雲迪克每一腳解圍，不論左腳右腳，都精準無誤？講嘅唔係解圍後嘅落點準確，而係一腳撻Q或食唔應個波而解圍唔夠高唔夠遠都無。又其實唔難？Okok，你贏 _ 哂。
放下身段嘅史杜列治
作為大 Ching 嘅 Fans，大 Ching 無疑曾經因無法融入高普嘅體系而有點感覺放棄足球、不再享受足球，而搞到成日覺得周身傷痛拒絕落場。直至到上季外借西布朗、直至到利物浦奇跡般打入歐聯決賽（無可否認佢無將利物浦擺係第一位係抵打），可能令大 Ching 終於明白，放下昔日 SAS 嘅身段，承認高普嘅一套，重拾對足球嘅熱誠，先係「正確決定」。故，今仗以一球有今生、無來世嘅入球向大家正式宣佈，「我感覺到大師兄返咗嚟」。
作結
今場比賽，利物浦方面，沒有最佳，也沒有最差，車路士確是有備而來，夏薩特亦的確好強好強；更重要一點，作客史丹福，即使油王未入主亦都從來唔容易。覺得今場三分志在必得，除咗係對車路士嘅不尊重，而係對自身嘅不尊重，呢種利迷，理應「敬」而遠之。
