教人喜出望外嘅 FIFA 19 | 蔣美葉
必須先強調一點，本來對 FIFA 19 係完全無任何期待，不過是覓得友人「開心Share」$699 才提早三日開波。
驚喜位 1. —— 穩定嘅節奏
今集最明顯做得比上集好嘅係，SB 同 Division 嘅節奏更一致，大家都毋須因應遊戲模式而喺適應遊戲嘅速度同節奏上作調節。
驚喜位 2. —— Custom Tactics 嘅改善
FIFA 18 其中一個最為人詬病嘅地方，就係 Custom Tactics 內無論如何設置，都無法得到理想（或有差別）嘅深度、闊度、壓迫性、各位置進攻嘅參與程度；嚟到 FIFA 19，喺加入 Game Plan 之餘，防守同進攻嘅深度同闊度都會因應調節有所明顯嘅轉變。如是者，今集眾人要如何因應不同 Formation、不同球員嘅 Workrate 來調教出心目中最佳、用落最順手嘅陣容，似乎要花多點心思去嘗試和練習。
驚喜位 3. —— 更像真嘅 Skill Move
Made famous by Andres Iniesta, the “La Croqueta” skill move is in FIFA 19!
It will be a 4* skill move
— Career Mode Network (@FifaCMNetwork) 2018年8月28日
正當 PES 2018 來勢洶洶，坊間不乏機迷盛讚 PES 在盤球同扭波做得比以往更像真之時，EA 終於不敢怠慢，就 Skill Move 嘅流暢性會明顯因球員嘅不同能力而有所不同發揮。筆者向來喜歡「正方交叉」Fake Shot 來擺過對手或調整好控球之用（呢一點明嘅自然明，唔明嘅可以去試下），但今集再難以一招走天涯；難免有點唔習慣，但眼見今集係所有 Skill Move 上作出大改動，而呢啲改動係能夠提升遊戲質素，少少嘅陣痛期，又何足掛齒？
驚喜位 4. —— 屈速不再
以往 FIFA 嘅世界內有一條不毀嘅金科玉律，就係踢波無難度，最緊要跑步，打 433 好、451 好、4321 好，只要有兩隻快翼，唔愁落唔到底出波，PES 亦然。但講返 FIFA，亦因爲大多數人打兩翼陣容配兩隻快翼，所以快嘅左右二閘從來不乏捧場客推高個「市價」。但今集 Physically 上最明顯嘅差別，沒有之一，就係速度上嘅差野再無好大好大嘅明顯；上一集你要搵個 60 速中堅追個 88 速以上嘅球員除咗博人地跑跑下抽筋受傷外，就係博幕後黑手 —— Handicap 嘅噩運降喺你對手身上，方可能出現薩巴列達、蒙維爾等追到 C朗、美斯嘅異象。
驚喜位 5. —— Ball Control 同 Strength 之重要性
承上一點，由於對速度嘅推崇大大減少，Ball Control 同 Strength 嘅重要性便因此而大大提高。當然 Balance 亦都好重要。由於屈速不再，要避免被對手輕易搶走個波，Ball Control 同 Strength 便不言而喻變得重要。唔明？究竟你有無玩過 FIFA？
另外，今集控球都變得更現實，因為 Ball Control 稍遜嘅球員都好容易因為傳球太大力而控甩腳，接應高波長遠亦然。無疑以往 FIFA 入面個個控波，長短中高波地波平飛波，甚至乎炮彈都好似食生菜咁容易，係較為失真嘅一面。
驚喜位 6. —— Stamina
物理上嘅改進，又點可以少咗體能呢一瓣。由 FIFA 16 開始，EA 便銳意針對體能作出調控，務求令玩家唔能夠再全場撳實個加速掣，畢竟現實世界再跑得嘅占士米拿都只係場均跑個 12、13 公里，又點可能好似打機咁真係下下全速跑爆足 90 分鐘？但 EA 嘅決心，似乎嚟到 FIFA 19 先叫「成功」，以往嘅設計，要不收唔到效果，要不就太容易因莫氣繼續跑而抽筋離場。FIFA 17 打 Pro Club 時，70 分鐘出現球員因「斷氣」而受傷嘅情況，一場可以見三四次）。但嚟到今集就似乎終於取得平衡，唔係唔俾你跑，但明顯因應體能嘅下跌而速度上亦有明顯嘅下跌，電腦自動走位嘅範圍亦有明顯嘅縮小（順帶一提，今集啲走位終於正常返，依然會有零星嘅應現唔現，應標唔標，應縮唔縮，但都比起 18 大大減少）。
最後利申，兩日加埋都只係打咗十場左右，要不是我老豆唔係姓李，但已經深深感受到今集同上集嘅分別同改進…… 且慢，還看下星期才開鑼嘅 Weekend League 才再作定案，而且目前仍然未正式公開發售，即使成個旺角沙田灣仔早喺中秋節翌日已經「偷跑」都好，玩家人數應未達到最高點，目前就 EA 連線嘅表現作定案實屬言之尚早。EA 嘅嘢，都係睇定啲好，但目前而言遊戲內嘅改動是絕對值得肯定！
