一衫一意 – 1998/99 帕爾馬主場｜意甲大本營
今季帕爾馬重回意甲，令到不少球迷都極為興奮，而球會亦都隆重其事地推出咗藍黃橫條的作客波衫，以紀念帕爾馬係九十年代的光榮歷史。而當中講到最經典的，當然要講到1999年奪得歐洲足協盃（即歐霸盃前身）的呢一件主場波衫喇。
藍黃兩色是帕爾馬公國的代表色，所以很自然地就成為咗帕爾馬足球俱樂部的代表顏色之一。再加上呢兩組顏色的組合非常特別，所以作為波衫用色就顯得特別搶眼。由於當時尚未流行緊身波衫，所以即使係橫紋，著咗上身都唔會覺得顯肥。至於黃色的膊頭位再配上藍色衣領，令到成件波衫多咗分優雅。另外，長袖的版本係手肘位置添上了藍圈以及白色的Lotto商標，令到黃色純色的衫袖一啲都唔會沉悶。
講咗噉耐，當然不得不提翻呢件波衫心口的贊助商 – 帕瑪拉特集團（Parmalat）。帕瑪拉特是意大利最大的乳製品公司之一，輝煌時期可以講起遍佈全球，係意大利唔少公司企業的榜樣。90年代初期，帕瑪拉特的老細坦濟（Stefano Tanzi）買下咗呢隊本土隊伍，並悉心裁培呢隊帕爾馬，結果球隊亦順利係足球界站穩咗陣腳，成為咗「意甲七姊妹」的一部份。但到咗2003年，帕瑪拉特集團被揭發金融違規，結果不單止公司宣佈破產，連老細亦都鋃鐺入獄，而帕爾馬雖然都算勉強捱得住，但最後去到2015年依然避不過破產的命運。
既然講起「帕瑪拉特集團時期」的帕爾馬，唔知大家又最鐘情於邊個球員呢？不如分享吓？
