被過譽的馬高域 | 蔣美葉

轉會窗死線夜，利物浦官方喉舌 James Pearce 在個人社交帳號報導：「馬高域將以 290 萬鎊轉投比甲球會安德列治。」但不到六小時則再出文報導：「儘管馬高域人已在比利時，但轉投安德列治交易告吹。」隨後再補充交代：「球員與新東家就個人協議未能達成共識。」

拿沙·馬高域，這位愛穿上 50 號球衣的小伙子，曾經被利迷寄予厚望。原因可能很簡單，因利物浦在追逐他加盟的過程並不容易，需面對多支歐洲豪門的競投。結果紅軍以 2000 萬鎊簽下這名塞爾維亞新星。

加盟紅軍初時，羅渣士偶爾才讓馬高域上陣。但就在寥寥可數嘅上陣機會中，馬高域在利迷心中仍留有代表作 —— 2015 年 1 月 10 日，利物浦作客光明球場，紅軍以 1-0 擊敗主隊，當日入球球員正是馬高域。現在來回帶當日入球，可見馬高域即使身材矮小，但憑過人速度後發先致，並把握對方禁區內嘅混亂快腳將皮球篤入。及後，馬高域亦有一記精彩功夫射門，可惜過唔到主隊門框，中楣彈出（傳送門，不用了吧？至今歷歷在目）。

講到歷歷在目，可能會予人錯覺，馬高域真係唔錯，欠嘅只係常規上陣機會。可是，馬高域欠的不是上陣機會，所欠缺嘅係佢個人對勝利嘅渴求心態不足。當年馬高域被士砵亭「彈鐘」時，曾有外國講波佬以一個字形容馬高 —— just not good enough。隨後外借加盟侯城半季，表現即使備受今日已執起隔籬街教鞭嘅馬高施華盛讚，甚至有意將佢帶到隨後所執教嘅屈福特，但交易最終因屈福特簽下了李察利臣而不了了之；而另一方面馬本人亦無意跟隨侯城降落英冠作賽。

投屈福特不成，不忍加盟侯城，結果利物浦再次將馬高域外借至國外球會，而且係比費倫巴治和士砵亭再低一個檔次嘅比甲球會 —— 安德列治。在安德列治嘅日子，表現依舊浮浮沉沉，亦沒有任何一項數據教人感到驚喜。

如是者，庸庸碌碌一年又過去。2018 年夏天，馬高域再次回到利物浦集訓，並參加了球會嘅 2018 年美國之旅，亦參與了其餘大大小小不同的季前熱身賽。但當轉會死線一日一日咁逼近，有關馬高域離隊嘅傳聞又再成為各大媒體的標題。最後就是文首開頭，James Pearce 報導了利物浦同安德列治達成協議，但最終因個人條款而令交易告吹。

球迷可能以為，最終以馬高域落選紅軍英超廿五人名單而告終。但就在 9 月 3 日，當我喺 Twitter 上睇下有無有關 FIFA 19 更多新球員數值時，卻看到了以下一則 tweet：

誰是誰非，導致交易告吹嘅原因必然是因為個人條款談不攏，但係單純因為一個錢字定另有案情，留待閣下自行判斷。不過當有指安德列治只能給予 2 萬歐元週薪，而馬高域目前在紅軍最後一年合約期仍能收取每週 3 萬鎊週薪，相信真相已水落石出。

蔣美葉