利物浦開鑼日 —— VAR 好重要！好重要！好重要！ | 蔣美葉

利物浦英超開鑼，輕描淡寫下以 4-0 擊敗今季同樣大肆擴軍嘅韋斯咸。開記錄嘅一球同完上半場前嘅一球，爭議都不大，多個慢鏡清楚交待沙拿並無越位；而文尼完半場前為韋斯咸提早拔喉嘅一球，就連半點嫌疑都沒有。

但問題球就發生在文尼所攻入嘅第三球（個人嘅第二球），文尼明顯處於越位位置，但主球證以至旁證都視若無睹。忽然潔癖一吓，呢球誤判無疑為今場 27 年來首次於開鑼日大勝對方 4-0 嘅勝仗添上少許污點。

雖有統計、分析為英超球證嘅質素、執法水平平反，指英超球證並非如球迷或教練所嘲諷般低劣…… 對於如此阿 Q 嘅講法，一句「零容忍」已經可以作罷；若再細讀呢類文章，亦好容易發現撰文者別有用意地將 Easy Decision 同 Critical Decision 糢糊化，好有粉飾太平嘅味道。

若果你問我，如果因為有 VAR，利物浦今場最終被韋斯咸絕殺扳平，甚至反勝，你依然想要有 VAR 嗎？毫無懸念，答案係，我仍然想英超有 VAR。即使世界盃期間，喺體嘢有唔少筆者及主持（包括老總）都曾撰文或透過聲音節目指出，即使 VAR 嘅引入，亦無法 100% 杜絕執法不公、誤判、黑哨等嘅問題；但於我而言，VAR 嘅引入，至少喺向前進，而非原地踏步，更遑論開倒車。而且 VAR 喺足球界屬新技術，為何 VAR、何時 VAR、如何 VAR，球壇仍然有很大空間去摸索同探討來完善。

利物浦受惠於誤判而取得入球，作為利迷固然難掩興奮。但洋洋得意時，亦毋忘利物浦過去多次因球證嘅誤判而被「打窒道氣」。最近亦有統計指，利物浦係上季英超因誤判而失分最多嘅球會。

而且，VAR 嘅引入，除咗係對受害者提供保護，亦係對長期有 4424 之嫌嘅球會嘅保護。可以讓嫌疑清洗，對嘛？

最後，兩日前嘅法甲開鑼戰 —— 馬賽對圖盧茲，馬賽就因為 VAR 嘅引入而得以「追回」應得嘅十二碼，亦憑住呢球十二碼喺臨完半場前打破僵局，最終以 4-0 打響頭炮。如此情節，不禁大嗌三聲，VAR 真係好重要！好重要！好重要！

蔣美葉