體嘢唔會再update任何關於曼聯嘅轉會資訊，大家睇完BBC記者Simon Stone嘅總結就明。今次嘅轉會窗已經話畀大家知，曼聯領導層向摩連奴投下左不信任票。
但如果大家將呢種舉措解讀成落雨收柴，就係大錯特錯，因為除左買人，領隊都要展現解決問題嘅能力，而且即便係利物浦、曼城、車路士，都有滿足唔到領隊要求嘅時候，唔通高普、哥迪奧拿同沙利仲會喺轉會窗完結前十日，繼續埋怨得不到支援？
Chances rising of no @ManUtd signing. No bid for Alderweireld yet. Costs of Mina deal prohibitive. Boateng proposal was loan but that’s now gone. Time for situation to change but who can they get who would make a difference – and at what cost? Jose spent £61m on Bailly/Lindelof.
— Simon Stone (@sistoney67) August 8, 2018
唔好忘記，高層已經支持摩連奴買兩個中堅（拜利同連迪路夫），而且加上普巴、盧卡古、馬迪、山齊士，以上收購嘅規模已經係超出好多球隊嘅能力範圍。但經過呢啲收購後，摩連奴仍然將問題對焦喺買人，但喺攻守體系嘅設計上唔可以再進一步。嚟到第三季，佢一定要向全世界展現佢嘅執教功能同管理能力，可唔可以帶領球隊更上一層樓。更重要嘅係，與摩連奴對著幹嘅普巴，曼聯唔賣；摩連奴希望清洗嘅馬斯亞，曼聯都唔賣。摩連奴恰恰想出售嘅，係球隊上下寄予厚望嘅未來，而摩連奴正正企喺球隊未來基石嘅對立面。活華特否決出售佢地，係明智嘅選擇。
身為曼聯球迷，支持領隊係應該，但唔係不問情由地支持。如果一個領隊喺陣容重建上方向有誤——繼續用高價同高薪嘅29、30歲填補中軸線，毋視球隊嘅陣容管理同薪酬架構嘅壓力，同特區政府一味浪費喺大白象工程並無分別。否定摩連奴，唔係對於曼聯球迷支持主帥嘅傳統有所背叛，而係基於對曼聯長遠未來嘅考慮。
而家先係摩連奴證明自己能力嘅時候，請大家拭目以待。
