作為一個香港球迷，就聘請港隊主教練一事我個人又有幾個觀點想同大家分享一下。
【世界排名】
追世界排名或許可恥，不過喺兩個層面上真係好有用。
第一，成績對於代表隊而言絕對係重要嘅一環，畢竟有成績就更容易獲得支持。而眾所周知，亞洲足協比賽嘅抽籤充滿智慧，係按世界排名去分檔次。想喺大型比賽走得更遠，例如殺入亞洲盃決賽周，外圍賽嘅檔次同抽籤絕對有能力改變港隊喺一屆比賽嘅命運。如果追排名可以港隊喺大型賽事帶嚟更好嘅形勢，有利港隊爭取佳績，我唔覺得係壞事。
第二，政府對足球嘅撥款都會睇指標，偏偏政府嘅智慧同亞洲足協都不相伯仲，係會將世界排名視為發展目標。如果追世界排名係有助爭取政府對足球喺金錢上嘅支持，發展場地同青訓，咁追排名都唔係問題。
【熟悉香港足球】
如果我係甘巴爾，我離開香港五年，真係唔夠膽講自己熟悉香港球員。
五年，足以令傑志由4-3-3陣式變做三後衛，再喺亞洲賽變返4-4-2；五年，足以令港隊嘅骨幹換人；五年，亦足以令陳肇麒由外流前鋒變成飛馬中堅。
不論球隊體系、代表隊人選，到球員踢法，五年都可以令香港足球大變。以往甘巴爾嘅踢法適合、有成績，唔代表宜家都係咁；佢以往對香港球員嘅理解，亦未必適用於現今嘅香港球員。
當然甘巴爾喺香港球圈打滾過，係比較有利嘅條件；但係闊別五年，要再重新理解過香港現今球員嘅特性、習慣嘅戰術體系，呢段磨合期對佢而言相信同其他教練冇分別…… 除非大家覺得宜家嘅香港足球同五年前相比，係一啲改變都冇。
【港隊教練嘅責任】
由始至終我都相信，代表隊嘅成績佔一定嘅重要性；而代表隊教練嘅責任，就係揀啱嘅人，用啱嘅戰術，建立一隊能夠取得好成績嘅球隊。
如果係要提升香港球員嘅技術水平同戰術素養，球會同青訓梯隊比起港隊，絕對係更加合適嘅地方。大家又唔係唔知本地球會係幾咁樂於放人去港隊操練 (望下亞運隊咪知)，靠港隊先可以令球員成長嘅話，咁就真係大鑊。
對我而言，如果甘巴爾教唔到港隊，重返香港執教港超球隊，或者執掌港隊青訓體系，我都係樂觀其成。不過人地都去咗印度教波，所以都係算數啦。
另，金判坤執教嘅時候，港隊舊年試過打和新加坡；而Gary White領軍嘅中華台北，今年亞洲盃外圍賽係贏到架。唔係要一場論高低，不過係咪約戰同級對手，就「搵本地教練教都得」呢？相信大家會有答案。
【團結香港球圈】
大家都知道，香港足球最大嘅問題，就係球圈咁多年來都未試過團結去做好一件事。討論邊位教練最適合執教港隊絕對唔係問題，但係帶頭抨擊其中一位教練人選，又係咪有利於團結球圈呢？
