近日內地微訊和 Twitter 上均流出一輯 EA 中國上海分支替一眾中超班霸上海上港球員拍攝半身照和大頭照的相片。有關相片更被 EA Sports 的微訊帳號讚好，此舉惹來全球機迷猜測：中超要登陸 FIFA 19 了！
其實早於兩集前，網絡上已不乏聲音希望 EA 能盡快收錄中超球隊，好讓一眾機迷能繼續與侯克 (Hulk)、奧斯卡 (Oscar)、拉米利斯 (Ramirez) 等一眾巴西兵再續「前緣」。
小弟都係 UT (Ultimate Team，FIFA 內遊戲模式之一) 嘅奴隸，即使並非中超迷，但若然中超登錄 FIFA，固然歡迎，畢竟為組隊上提供更多選擇。
隨便 Google 一下中超外援名單，除咗一眾巴西兵外，已轉戰中超而又因歐洲足球舞台而為人熟悉嘅球員包括馬斯查蘭奴 (Mascherano)、拿維斯 (Lavezzi)、柏利 (Pellè)、韋素 (Witsel)、卡拉斯高 (Carrasco)、謝雲奴 (Gervinho)、巴卡布 (Bakambu)、古亞連 (Guarin)、米基爾 (Mikel)、加泰 (Gaitan) 等，同埋壓軸介紹嘅 Winning 球王 —— 馬田斯！
所以，作為普通機迷對 FIFA 能夠加入越來越多不同嘅聯賽，係無辦法搵一個 Say No 嘅理由。但對於 EA 而言，加入中超又是否明智？是否能夠藉著加入中超而「做大個餅」？
只要玩過任何一隻足球遊戲都知，每一位球員都有其預設值。而 FIFA 內，各球員嘅預設值之高低是十分偏頗，亦一直存著唔少爭議。例如 FIFA 18 內嘅班捷明文迪 (Benjamin Mandy) 其預設值只有 78，便惹來球員本人曾於 Twitter 上詢問 FIFA 的開發人員家中是否沒有電視。
講到呢度，心水清嘅讀者大概都知道為何標題寫著「自挖墳墓」四個字。因為中超登錄 FIFA 19，意味著 EA 將要為每一位中超球員設定一個能力值，同時亦要決定每一位球員嘅 Skill Moves 同 Weak Foot 星數。在內地球迷普遍都認為中超為地球上最高水平嘅足球聯賽時，若果 EA「有眼不識泰山」，只給予中超球星，如武磊、張琳芃、鄭智等介乎 70-75 能力值，難免會引發一輪或無日無之的網絡生態災難。
不過，其實 EA 早已夥拍騰訊打入內地市場，FIFA Online 和 FIFA Mobile 在內地嘅收入更保守估計一年高達 20 到 30 億人民幣。而且 FIFA Online 和 FIFA Mobile 兩隻遊戲都有「繼承」功能，讓玩家繼承上一集嘅部分心血，所以亦有內地玩家表示對 FIFA 19 不予理會，實行你有你 FIFA19，我有我「臥奶」同「毛把」。
EA 嘅算盤，不禁叫人大呼一聲：厲害了我的驚！
