利物浦龍門危機 —— 其實唔難 | 蔣美葉
「有一日，一對父子騎驢入城。途中遇見第一位路人甲，路人甲見狀斥父子一同騎驢，是虐待驢仔；如是者，父子二人一同落地而行。不久遇見途中第二位路人乙，路人乙見父子二人居然有驢唔騎落地行，便嘲笑一番；如是者，父親折衷之下，只讓兒子騎驢，自己繼續徒步而行…」
打吓打吓，個故事原來都幾浪費字數。相信大家都聽過呢個故事，所以唔嘥大家時間了。
當卡列奧斯喺歐聯決賽不幸「派膠」兩次，信心盡失時，賽後有對佢不離不棄嘅，指經歷呢次大錯，靚仔他日可成大器；亦有支持賣走佢嘅，指信心盡失，神仙都救唔返。
然後，當利物浦收購奧邦歷 (Oblak) 或艾利臣 (Alisson) 無哂聲氣時，高普「語出驚人」表示來季好大機會繼續俾機會卡列奧斯，又有人會話卡列奧斯咁樣只會更大壓力，又有人會話得到領隊嘅信任可以紓解壓力。
借兩父子騎驢嘅故事套落卡列奧斯身上，其實無論哪一個決定、哪一種講法，都唔會為靚仔減壓。因為撥開一切，究其實壓力都係嚟自靚仔佢自己每一次嘅低級犯錯。
有利迷指，利物浦龍門教練 John Achterberg 亦要負上責任。確實，JA 成為紅軍門將教練後，利物浦從未出過一位穩健龍門。但退一萬步說，當一個龍門一而再、再而三咁犯下低級錯誤，根本與人無猶。
收購新門將無望，換龍門教練更如天方夜譚，利物浦要解決門將表現不穩嘅困境，其實遠在天邊、近在眼前 —— 丹尼·獲特 (Ward)。
上屆獲特上陣機會唔多，但寥寥無幾嘅上陣時間都為佢贏得利迷嘅肯定。若果可以回到一年前，將獲特外借予赫德斯菲一季，相信今日嘅問題同不確定性所帶嚟嘅憂慮可以一掃而清。
利物浦未來一個月將有一連串嘅季前熱身賽，在米奴列未歸隊前，利物浦理應安排獲特與卡列奧斯各把關半場，對獲加而言固然係最公平嘅做法；同時，咁先係對卡列奧斯最公平嘅安排。
