俄羅斯世界盃表現總結｜俄迷講兩句
編按：體能雄渾、充滿幹勁、擅長死球，或者是球迷對俄羅斯今屆世界盃好表現的印象。俄佬足球為大家總結俄羅斯球員和主帥的發揮，讓大家對主辦國的足球有更深刻的認識。
一、教練
要如何評價車捷索夫呢位教練？車捷索夫確係有趣。由佢接手俄羅斯後，佢嘅考牌戰已經係帶兵出戰洲際國家盃。
分組賽出局、執教風格沉悶、當時堅持用352，當時球迷莫不擔心俄羅斯喺世界盃嘅表現。加上世界盃開波前夕，俄羅斯喺友誼賽表現不濟，繼續展示風格沉悶，令人對車捷索夫失去信心。不過，車捷索夫成功將保守風格帶入俄羅斯，紮穩防守基礎，加上主場氣勢加持，俄羅斯喺分組賽擊敗沙地、埃及，輸畀同組首名大熱烏拉圭，係正常表現。
喺世界盃決賽週，車捷索夫終於識變動，因應對手特點棄用3陣式、轉踢4陣式（編注：俄羅斯經常臨場變換三、四、五後衛陣式）。能夠促使車捷索夫轉陣，當然與人腳有關。今屆世界盃比起上年洲際國家盃個時人腳整齊得多：一眾主力，如馬里奧費南迪斯、卓利舒夫、迪沙哥夫、迪蘇巴、祖比連能夠復出。今年更有新血加入，例如古迪普夫、古沙耶夫同阿歷斯米蘭卓克。
雖謂人腳齊整，但車捷索夫仍然有自己嘅堅持，例如執意起用格辛斯基、祖比連踢中場中，轉守為攻效果一般，直到十六強先肯棄用格辛斯基。車捷索夫做得最啱嘅一著，就係轉中鋒：近年史莫洛夫正選席位穩如泰山，但迪蘇巴嘅傳統柱躉式中鋒打法更加有效，令史莫洛夫退下正選。所以你話車捷索夫係咪好難捉摸呢？
二、整體俄軍風格
至於今屆俄羅斯風格係點？又係個句:主場加持。因為講表現，俄羅斯唔係超班，對住強隊現哂形係正常。講進攻，俄羅斯確係乏力。自從迪沙哥夫傷出以來，靠高路雲獨力苦苦支撐，創造力始終不足。左翼卓利舒夫總係專射高章波、又要扭兩扭，效率一般。至於史莫洛夫，真係唔想再提。佢失去正選前鋒席位，絶對同打法有關：黏波太耐，第一場正選更加同隊友撞位。所以俄羅斯一換史莫洛夫落場，就會變左一味打搓波、拖低節奏，搞成咁何不索性用迪蘇巴？迪蘇巴以表現話你知，柱躉式中鋒打法無問題，甚至更實用。另外，右路組合亦都夾得好好，森美度夫同馬里奧費南迪斯相當合拍，前者為馬里奧費南迪斯釋放更多空間。
講埋後防。門將艾堅菲夫已經無可挑剔，屢救險球。老將恩拿舒域治臨危受命，偶有犯錯，但大部份時間都算係幾淡定。拍檔古迪普夫更加係今屆賽事彈出，佢嘅出腳、封波相當冷靜。世界盃前夕，仲有人質疑舒哥夫，佢以表現話你知點解仲可以穩坐左邊，因為勝在回防效率夠快。
四年後，艾堅菲夫、舒哥夫、森美度夫等隨時引退，俄羅斯開始少少有新血接捧，高路雲，米蘭卓克兄弟四年後是你們的嗎？
資訊浩瀚；東張西望。
竭盡所能；深入求真。
企高一格；全新體法。
