世界盃fantasy －八強前執陣要注意的事｜Eason
世界盃嚟到最後八強，話咁快fantasy都去到最後三round，今次就講下八強前執陣有乜嘢要注意，皆因隨時係你追分嘅最後機會！
先講一講，最後兩round有5個免費換人名額，基本上都係圍繞四強隊伍去執陣，唔使擔心球隊出局同球員會無得再上陣嘅問題，四強輸咗仲有季軍戰，即係點都有兩場波打。不過相信到時全世界個陣都差唔多，始終球員選擇越來越少，分數相差唔會太大。所以未用Wildcard嘅你，喺八強用啦！儘量執到隊波有齊15個八強球員，未用Bench Boost或者Maximum Captain就用埋佢！記住Wildcard可以加埋Bench Boost或Maximum Captain一齊用！
八強前可以免費換人嘅名額：3個
我都有唔少朋友喺十六強嗰時有keep西班牙嘅球員，大多數係Isco同Costa，甚至乎有埋佢哋嘅後防。如果你都係嘅話，免費嘅換人名額點都要用喺佢哋身上，因為佢哋身價都高，唔換佢哋，啲錢就會郁唔到浪費晒。唔好彩，有5個或以上球員出咗局，有Wildcard就用Wildcard，無嘅話唔一定換走晒佢哋，個人覺得keep住有13個球員都ok，想扣分換人換一個好啦（會扣4分），換兩個要扣8分，真係唔值。
每隊最多可有嘅球員：5個
喺八強All in 5個球員係咪值得呢？我認為All in一隊都可以，萬一嗰隊出咗局，都有下一ronud 5個免費換人名額畀你換晒佢哋，加上原有班底，盡量好似做到上面提到有13個球員出場，四強第一戰有球員低分，都可以喺bench換兩個球員出場搏下高分都好啊嘛。另外，有信心嘅你呢個時候All in兩隊（10個球員）會唔會係個好選擇？一出局，最多剩餘5個球員，四強你就要扣4分先會啱啱令隊波有11個人，搏唔搏得過大家真係要諗諗啦。
累積黃牌停賽問題：
除咗上述所講球隊八強出局而引致四強要用免費名額去換球員外，有唔少球員喺八強再攞黃牌就要四強停賽，到時又要換走佢，隨時浪費多一個名額！你隊波唔好彩無啦啦有幾個人同時停賽再加上出局球員，到時就要用更多名額換走佢哋，真係喊都無謂，有得揀就唔好揀太多孭住黃牌喺身嘅球員啦。以下係部份八強有黃牌喺身而fantasy多人揀或主力球員。
法國：Pavard,Giroud,Pogba
烏拉圭：Bentancur
巴西：Neymar, Coutinho
比利時：Meunier, Vertonghen, De Bruyne
俄羅斯：Golovin, Kutapov
克羅地亞：Vrsalijko, Rakitic, Rebic, Mandzukic
瑞典：Claesson
英格蘭：Walker, Lingard
老實講，喺呢個時候大幅追分係有難度，因為可以揀嘅球員越來越少，大致上都喺入嗰堆人，想追不如放手一搏，搏一啲分組賽或十六強未高分過嘅球員，甚至一啲會後備出場嘅球員，分分鐘有加時，到時就靠佢哋攞分！話唔定畀到大家驚喜。又或者真係重點all in一兩隊，最多不成功便成仁，反正如果唔係排前列，輸多十分都冇大分別。
今次就講到呢度啦，主要都係希望提一提返策略上嚟講，覺得現時成績ok嘅，喺private league位處前列嘅，有險可守嘅，就要保守少少，同時望遠少少，唔止諗八強要執乜嘢陣，記住要諗埋四強。至於已經nothing to lose嗰啲，8強真係追分嘅最後機會，真係不妨孤注一擲，睇下會唔會進步直路時有得俾返少少壓力前面。最後，希望大家輕鬆攞分啦！
Eason
資訊浩瀚；東張西望。
竭盡所能；深入求真。
企高一格；全新體法。
